Xefe Investigadór PSIK, Maria Francisco de A. Tavares esplika, ekipa intijensia halo ona investigasaun no vijilansia intensivu molok kaptura suspeitu iha area Bairo-Pite.
Tuir Xefe Investigadór ne’e, JM hala’o ninia asaun ho modu oioin atu bele konvense vitima sira. Fofoun nia dehan katak nia mediku ida iha Hospital Nasionál Guido Valadares, maibé hafoin halo konfirmasaun identifika katak nia laos mediku.
La to’o ne’e de’it, suspeitu mós deklara an nu’udar membru Polisia Militar (PM) ne’ebe envolve iha prosesu rekrutamentu ba trabaladór. Hafoin verifika, iha serteza katak nia laos membru F-FDTL.
Atu konvense di’ak liu tan vitima sira, nia mós hatete katak nia nu’udar oan husi membru governu ida, no iha relasaun di’ak ho politiku na’in sira, nune’e bele garante haruka ema ba servisu iha rai li’ur.
“Suspeitu promete ba vitima sira katak atu aranka ba Australia iha 15 Fevereiru, no nia adia fali ba 19 Fevereiru maibé la konsege, no nia hatete tan ba vitima sira katak aban (25 Fevereiru) aranka ba Austalia,” informa Maria, iha edifisiu PSIK, Kaikoli, Tersa (24/02).
Iha ninia asaun ne’e, suspeitu mós uza karreta aluga hodi evita identifikasaun. Maibé, liu husi investigasaun no koordenasaun ho veíkulu na’in, ekipa PSIK konsege identifika autór.
Kapturasaun ne’e halo hafoin PSIK simu keixa husi vítima na’in rua. Bazeia ba evidénsia konversasaun no dokumentu sira ne'ebé halibur, polísia deside JM sai nu'udar suspeitu.
Maski vítima na'in rua de'it makhato’o keixa, maibé investigadór sira fiar katak númeru loloos vítima nian aas liu.PSIK mós deskonfia suspeitu la servisu mesak no investiga hela posibilidade envolvimentu rede sira seluk.
To’o ohin, autoridade sira seidauk konfirma suspeitu nia estatutu ofisiál empregu, maibé bazeia ba informasaun preliminária, nia la’ós funsionáriu públiku.
PSIK husu ba públiku atu kuidadu ho promesa serbisu ba rai li’ur ho prosesu lalais no ezije osan boot la ho prosedimentu loloos. Husu ba públiku atu relata kualkér indikasaun kona-ba fraude ne'ebé hanesan.
