Diretór Nasionál Infrastrutura Edukativa-ME, Hélio Lopes hatete, Ministériu Edukasaun rejistu ona projetu kontrusaun edifisiu ESTV Hera, ne’ebé abandona husi kompaña Timorindo Lda, tanba ne’e provizoriomente ministériu hapara ona.
Diretór dehan, projetu refere antes IX Governu tama ne'e abandona kle’ur ona, tan ne’e Ministra Edukasaun, Dulce de Jesus Soares deside, halo avaliasaun maibé realidade hatudu katak projetu ne’e abandona.
“Provizoriomente ita hapara ona, no kontratór ne’ebé responsabiliza ba projetu ne’e ita la permite nia atu halo kontinuasaun tanba nia abandona tempu kle’ur ona. Molok IX mai projetu ne’e abandona kleur nanis tiha ona entaun Ministra Edukasaun husu atu halo avaliasaun maibé realidade hatudu duni katak projetu ne’e abandona," nia informa.
Diretór esplika, Kompaña Timorindo halo kontrusaun ba projetu ne’e maibé depois asina tiha kontratu kompaña abandona desde iha tinan 2023 ne’e kedas depois ministériu halo kedas asaun hodi deside hapara no ministériu sei halo fali exersísiu tuir mai.
Hélio akresenta, tanba saida mak kompaña abandona ministeriu lakohi buka hatene tanba ida ne’e kulpa kompaña nian, maibé ministériu halo desizaun tuir kontratu ba projetu refere.
“Nia abandona hodi la kumpre ninia kontratasaun, nia la kumpre tanba dalaruma nia iha limitasaun orsamentu, nia jestaun husi hirak ne’e, maibé ministériu lakohi buka hatene tanba saida mak nia abandona maibé ne’e kulpa ninian ami halo desizaun tuir kontratu ba projetu refere,” nia hato’o.
Nia dehan, projetu refere nia kontrusaun liu ona tinan rua maibé atinji nia progresu foin iha pursentu 40 (40%).
Enkuantu, orsamentu ba projetu refere ho montante hamutuk $199,119,76 ho nia durasaun tempu fulan neen (6) ne’e hahú ona iha loron 30 fulan-Novembro 2021 no sei termina iha 31 Maiu 2022.