Enkuantu, ba nesesidade sira seluk hanesan, naan manu ka (ayam potong) labele distribui ba benifisiariu sira, tanba komunidade sira balun laiha sasan eletronika liu-liu jeleira atu tau naan sira ne’e, no bele hetan estraga hotu.
Nia dehan, iha suku refere, iha benifisiariu hamutuk rihun 30 resin, ne’ebé asesu ba iha programa sesta bázika ne’e.
"Tanba, uluk ami simu sesta básika faze dahuluk nian ne'e, ho ayam potong barak, tanba komunidade kbi'it la’ek balun laiha jeleira, entaun ami prefere liu se bele sesta básika faze daruak ne'e, lori foos ho mina de'it mos di'ak, liu-liu kafe no masin-midar, atu nune'e povu sira bele sente duni benefisiu husi programa ne'e," dehan nia ba Online INDEPENDENTE, iha knar fatin, Suku Kamea, segunda horseik (20/06).
Tuir nia, iha programa sesta básika faze dahuluk nian ne'e, Komunidade barak mak nia sasan balun estraga de'it, nune'e ladun fó benefisiu ba komunidade ne'ebé laiha kbiit sosa sasan eletronika atu uza tau produtu sira ne’ebé presiza tau iha fatin ne’ebé malirin.
"Ita hatene Dili rai sidade duni, maibé ami nia komunidade barak mak hela iha area rural sira, pur ezemplu iha aldeia 7 iha suku ne'e, mak sei hela iha foho leten, agora fó sasan sira ne'ebé importasaun, ha'u hanoin komunidade barak mak laiha jaleira, entaun sasan balun bele sai aat," tenik nia.
Nia Informa, se fó sasan ne'ebé importasaun, dala ruma Komunidade sira uza iha tempu badak de'it, tanba laiha ekipamentu ruma hodi satan ba hahan importansaun sira, tanba ne'e di'ak liu fo sasan produto lokal atu sira bele uza ba tempu naruk.
Molok ne'e, governu liu husi Ministeriu Turizmu komersiu no Industria ( MTKI ) no Sekretaria Estadu no Kooperativa (SEKOOP), implementa ona sesta bázika faze daruak nian , iha Aldeia Baia Leste , Suku Komoro , Postu Administrativu Dom Aleixo , Munisipiu Dili, iha loron 17 fulan-Juñu tinan ne'e.
Ministru Turizmu Komersiu no Industria , José Lucas do Carmo , hatete , objetivu husi distribuisaun sesta bázika faze daruak nian ne'e, atu fortifika ekonomia no mós hasa'e produsaun aihan lokal iha rai laran .
Nia hatutan, programa sesta basika ne'e, medida ida husi planu rekuperasaun ekonomia ne'ebé halo ona iha tinan 2021 no kontinua programa ne'e ba faze daruak nian. Nune'e, programa sesta bázika faze daruak ne'e la'o tuir baze legal, tuir dekretu lei nú 2 / 2022 , loron 4 marsu .
"Iha programa sesta bázika faze daruak nian, produtu sira ne'e mai husi rai laran, balun deit mak husi rai liur tanba, produto rai laran la sufisiente," dehan nia.
Governante ne'e esplika, produtu ne'ebé importa liur mak, masin-midar, mina- sona, sasan ijiene, deterjen, foos no mós sabaun.
Enkuantu, produtu rai laran mak, fos rai, manu-tolun, fehuk - roupa, modo-tahan, repollo, koto, senoura no aifuan sira seluk tan.
Nia informa, programa ne'e atu la'o ho diak, presija ema hotu nia kontribuisaun atu apoiu maximu ba implementasaun programa refere, tanba programa ne’e laos governu nian de'it maibé nia benefesiu ba ema sira hotu, nune'e tenke iha responsabilidade .
Entrentantu, programa sesta bázika faze daruak ho nia mekanismu hanesan mós faze dahuluk nian, kada ema ida sei simu sasan ho montante dolar amerikanu $50.
