Prezidente KI, Virgilio Guterres, hatete, KI, liu husi plenaria foin dadauk ne'e halo ona deliberasaun ho númeru 07/2022, 06 de Maio, hodi halo prémiu jornalizmu foun ho naran "Prémiu Max Stahl ho nia kategoria dokumentáriu di'ak liu, ba asuntu direitu umanu hanesan prémiu sira seluk ne'ebé antes ne'e atribui ona ba jornalista mellór sira.

Premiu ba jornalizmu nian ne'ebe KI anúnsia ba publiku depois liu husi enkontru plenaria deside, hamosu tan premiu jornalizmu ho naran premiu Max Stahl atu fó onra  ba Jornalista Max Stahl ne'ebé sai hanesan figura nasional eroi ba povu Timor-Leste.

“Prémiu ne'e nu'udar onra no apresiasaun ba jornalista naran Boot Max Stahl, ne'ebé kontribui ona ba luta libertasaun nasionál ba Timor-Leste nia ukun rasik-an liuhusi misaun lulik jornalizmu iha pasadu,”dehan nia liu husi Konferensia Imprensa iha Salaun KI, tersa ne’e (21/06).

Nia esplika, premiu jornalizmu Max Stahl ne’e, nia kategoria ba dokumentariu ne'ebé jornalista no organizasaun sira ne'ebé produz iha konteudu direitus umanus, kona ba asuntu sira ne'ebé eleva dignidade ema nian, ne'ebé publika ona iha orgaun lei komunikasaun sosial nian hanesan iha televizaun no radiu.

"Prémiu ne'e ita tau naran Max Stahl, tanba saudozu Max Stahl nuudar jornalista naran boot ne'ebé kontribui ona ba Timor-Leste nia independésia liu husi ninia obra jornalistika iha tempu okupasaun militár Indonézia nian," nia dehan.

Nia hatutan, desizaun ne'e, KI aprova depois publikamente hakarak lansa ba públiku, atu nune'e jornalista ka orgaun komunikasaun sosial sira ne'ebé hakarak aplika.

Tanba, premiu ne'e sei anunsia ba públiku, hahú aban ba oin jornalista sira no meius komunikasaun sira bele aplika.

Nune’e, KI sei atribui hamutuk ho premiu sira seluk iha Balibo, iha loron 16 fulan-Outobru, ne'ebé iha lansamentu ba loron nasional liberdade imprensa nian.

"Desizaun ba Prémiu foun ho naran Max Stahl ne'e, Konsellu Imprensa foti liu husi plenaria, ho ida-ne'e ita delibera kedas no públika ona iha Jornál da Républika. Tan-ne'e, ohin Konsellu Imprensa uza biban ida ne'e ho publikamente hato'o katak, ita iha tan prémiu jornalizmu foun ba jornalista timor-oan sira atu aplika,”tenik nia.

Prezidente KI  haktuir, anúnsiu prémiu foun ne'e nuudar oportunidade di'ak ba jornalista, kanál mídia no asosiasaun jornalista sira atu kontinua promove no defende direitu umanu iha nasaun demkorátiku ne'e.

Liu-Liu nafatin promove liberdade imprensa no liberdade espresaun, atu sidadaun timor-oan hotu iha nia direitu ba informasaun, edukasaun, saúde, bee no saneamentu hodi garantidu ba nasaun foun ne'e.

Ho nune’e, kontinua promove no luta ba direitu sidadaun sira nian ba moris di'ak, liu-liu públika notísia sira ne’ebé iha ligasaun kona ba problema sosiál ne’ebé povu hasoru, hanesan problema infrastrutura, edukasaun, saúde, bee-moos, saneamentu no seluk-tan.

Tan ne’e, medía nia funsaun mak atu kontrolu sosiál no sai lian ba sira ne'ebé lian laek.

Enkuantu, desizaun hamosu premiu foun Max Stahl ne'e, bazeia ba Lei Komunikasaun Sosiál, artigu 44 no Projetu Rezolusaun Parlamentu Nasionai numeru 83/V (4°), institui Premiu Max Stahl nuudar rekoñesimentu ba Saudozu Max Sthal nia luta ba libertasaun nasionál liuhusi ninia obra jornalístiku sira.

Entretantu, premiu Max Stahl ne’e, mai hamutuk tan ho premiu sira seluk ne'ebé KI fó sai ona hanesan, premiu Adelino Gomes ba Jornalistika ho lian Portugués, premiu Francisco Borja da Costa jornalizmu ba asuntus imprensa ka eskrita no asuntus sosiais, Greek Shackleton ba jornalizmu Radio televisaun nian no asuntus sosiais,  Premio Bernadino Guterres  foto jornalizmu nian, nune’e, hamutuk premiu neen (6) ho KI nian.

Enkuantu, kriteriu ba premiu Max Stahl nian ne’e, bele hare fali referensia saida mak Max Stahl halo no dokumentariu babain ne'ebé konsentra barak liu iha asuntu direitus umanus nian no asuntu sira ne'ebé sai hanesan atensaun ba jornalizmu nian no kreteriu seluk dokumentariu presija atu hare ninia aprezentasaun no peskija kona ba loron, faktus, laos situasaun atual.

Maibé, faktus sira ne'ebe istoriku bele haree iha Muzeum atu bele reforsa liu tan nia hanoin iha dokumetariu ne’e rasik no audiu vizual ne’ebé iha minutu 30.