Porta Vóz, Agustino da Costa Belo liu husi konferensia imprensa hatete, profesor voluntáriu ne'ebé asina ona kontratu iha fulan-Abril maibé to'o ona fulan haat seidauk fó sira nia saláriu.

Nia dehan, kontratu ne'ebé Profesor sira asina katak kada fulan hetan salariu ho montante dolar Amerikanu $272.

 “Tuir informasaun ne'ebé sira hetan katak kontratadu atu simu saláriu mínimu fulan tolu (3) no máksimu fulan neen (6), maibé realidade to'o ohin loron sira seidauk simu. Ami husi Professores voluntariu ne'ebé asina kontratu iha fulan abril tinan 2023, katak kuaze fulan hat ona maibé ami nia salariu sidauk simu," dehan nia iha Largo Lecidere, segunda (10/07/23).

Tanba ne’e, sira husu ba Pimeiru Ministru (PM) no Ministra Edukasaun, atu prosesa profesor sira nia saláriu, tanba sira fó hotu kontribui ba rai ida ne’e.

"Ne'e duni husi saláriu ne'e ami bele uza ba nesesidade hanesan, kafé kopu ida no paun fuan ida hodi sustenta kabun molok ami ba eskola hodi kontinua ajuda forma ami nia oan sira ba futuru nasaun RDTL," nia hato'o.

Iha biban ne'e mós, Prefesor kotratadu sira hato'o ba Ministra Edukasaun Dulce de Jesus Soares atu fó orientasaun ba ekipa sira hodi públika ona Profesor reklamante sira nia naran, atu nune'e sira mós bele asina ona kontratu.

"Ami nia esperansa katak, mandatu Governu dasia atu kontinua rezolve manorin sira nia kontribuisaun nu'udar rekusu ida ne'ebé iha kualidade hodi hanorin kanorin sira ba futuru nasaun RDTL," katak nia.

Portavóz ne’e haktuir, liu husi sira nia ejizensia hirak ne'e  profesor sei hein to'o semana ida, karik nafatin la iha rezultadu, mak profesor sei marka audensia ho Ministra Edukasaun.

Enkuantu, Profesor kontratadu iha munisipiu Díli, husi Ensinu Báziku to'o ensinu Sekundáriu ne'ebé asina ona kontratu iha fulan-Abril hamutuk 250. No Iha teritoriu laran tomak hamutuk 1.500.