Relasiona ho kazu positivu ne’ebé sa’e makas iha prizaun Bekora, tanba ne’e iha loron 14 fulan-maio, Minístra Saúde hamutuk ho Ministru Justisa akompaña mós husi responsável pilar sira hodi haree direta pasiente, no prepara fatin ne’ebé diak hodi izola pasiente konfirmadu.

“Ami mai iha ne'e hakarak komunika ho guarda prizioneru sira ho Ministru Justisa atu haree pasiente covid-19 sira ne'ebé asintomátiku ka laiha sintomas, dala ruma sira bele tau ketak maibé ita fó atensaun ba sira ne'ebé laiha sintomas maibé sira mós iha moras seluk nune'e sira ho sintomas no idade 60 ba leten ita hakarak atu assegura sira,” dehan Ministra Saúde (MS) Odete Maria Freitas Belo ba jornalista sira iha prizaun Bekora hafoin ramata vizita Prizioneru sira, (14/05).

Nia hatutan, ba dahuluk sira iha kondisaun fatin ne'ebé di'ak, atu nune’e labele hetan moras todan, maibé haree ba lista ne'ebé iha kuaze sira hotu laiha sintomas.

“Ita espera sira bele dezenvolve sira nia kondisaun ne'e di'ak bainhira iha loron 10 ou 11 nia laran deit, ida-ne'e mak ita nia esperansa,”tenik nia.

Governante ne’e informa, ba katuas sira ne’ebé idade ona, no sira ne’ebé vulnerável tebes ba moras ne'e husu ba Ministru Justisa atu tau matan ba sira.

Ho nune’e, Ministra Saúde presiza ajuda sasan balun hanesan kulsaun, máskra, hand sanitizer ba sira.

“Prizaun ne'e provizoriamente ema hamutuk 143 mak konfirmadu pozitivu covid-19 maibé iha mós númeru balun ne'ebé sei hein hela rezultadu no pasiente sira sei halo izolamentu iha fatin ne’ebé preparadu ona iha prizaun laran.

Entretantu, Ministru Justisa (MJ) Manuel Carçeres hatete, hafoin rona prizoneiru Juga Gama hakotu i'is iha sala izolamentu Vera Cruz Ministru fo kedas orientasaun ba diretor prizonais atu submete prizoneiru sira ba teste swab.

“Ita hatene katak ita nia maluk Timor-oan ida ohin hakoi, nia tinan barak iha prizaun laran no hetan desmaia guarda prizaun sira lori nia ba iha sentru saúde Bekora, aleinde halo tratamentu  ba nia halo mós teste swab, rezultuadu hatudu positivu, entaun evakua ba iha sala izolamentu Vera Crus hodi hetan kuidadu intensivu husi mediku sira,” nia informa.

Hafoin rona prizoneiru hakotu i'is iha sala izolamentu Vera Crus Ministru justisa fó kedas orientasaun ba Diretor servisu guarda prizonais atu halo teste swab teste ba guarda prizoneirus sira nomós dadur sira.

Prizoneiru sira ne’ebé detetadu ba covid-19 tanba, halo kontaktu besik ho matebian prizoneiru ne'e.

Nune’e ba sira ne’ebé hetan sintomas no laiha sintomas atu koloka sira ba fatin ne’ebé la hanesan.

Asistente Editor: Saturnina da Costa