Primeiru-Ministru, Kay Rala Xanana Gusmão hato’o agradesimentu ne’e ho matawen.

“Ha’u tenke dehan se ida ne’e ba nafatin iha ita nia rai no povu, tanba la’ós ita inimigu ba malu, maibé tanba povu ne’e, povu ne’e mak halo ita hamutuk, hamutuk iha hanoin, tanba ne’e mak lori naran Governu ho partisipasaun ida kritika mais konstrutivu teb-tebes husi imi hotu, ha’u hakarak deklara iha ne’e katak, governu retira nia pedidu votu konfiansa, tanba imi fó tiha ona imi nia liafuan vale liu surat tahan ida,” deklara PM Xanana iha Parlamentu Nasionál.

Xefe Governu reafirma, agora tempu ba goverrnu ida ne’e atu servisu makaas, servisu hamutuk ba kontrusaun estadu atu hadi’a povu no nasaun nia dezenvolvimentu.

“Dala barak teb-tebes ona mai iha uma fukun ida-ne’e, ohin ha’u bele dehan katak ho tempu la’o dadauk iha konstrusaun estadu no konstrusaun nasaun ho dezafiu no difikuldade ne’ebé ita mós ultrapasa tiha ona to’o agora, povu bele fiar katak bainhira temi reafirmasaun Estadu Direitu Demokrátiku ita boot (deputadu/a) sira mak iha ne’e hamutuk ho ami, ita reafirma ida ne’e iha Estadu Direitu Demokrátiku. Ida-idak ho ninia funsaun ne’ebé Konstituisaun RDTL fó, mandatu ne’ebé povu fó ne’ebé ita nia hanoin ida de’it atu serbi rai ida ne’e. Ne’e duni ha’u dehan katak dezde 2007 to’o 2015 primeira vez mak ha’u mai fila iha ne’e, primeira vez maka debate iha Parlamentu Nasionál hatudu katak ita komesa ona hanorin ita nia joven sira no sosiedade maturidade politika,” dehan PM.

PM Xanana hatutan, agora tempu ba mudansa no la’òs ona tempu atu kria inimigu ba malu, maibé buka de’it mak amigu hodi fó solusaun ba problema nasaun nian.

Hafoin rona deklarasaun Xefe Governu, deputadu sira hotu hamriik hodi basa liman hatudu respeitu no domin no la’o ba kumprimenta Xefe Governu ho membru Governu sira.