Sekretariu Estadu Ensinu Sekundariu no Eskola Téknika Domingos Lopes Kemis hatete, iha mandatu oitavu Governu nian konstrui eskola hamutuk 202 ba eskola sira hahú husi pre-eskolar to'o ensinu sekundária hamutuk 202, no iha atus ida (100) mak remata ona nia konstrusaun.

Nia dehan, tan ne'e Ministra Eduksaun hamutuk ho Sekretariu Estadu Eskola Sekundariu no Eskola Téknika hala'o ona enkontru ho ekipa tékniku-Ministeriu Edukasaun hodi ko'alia kona-ba prosesu no progresu sira ne'ebé durante ne'e.

"Projetu Komunitáriu balun iha hela faze konstrusaun no balun agora iha ona faze inagurasaun, nune’e balun konstrui ona maibé prosesu la la'o tanba iklima ladiak hodi la fó espasu atu kareta sira mobiliza materia ba terrenu," dehan nia iha knar fatin, Ministeriu Edukasaun, Vila-Verde, kinta (20/07).

Nia akresenta, projetu sira ne'e kuaze implementa hotu ba eskola sira iha munispiu sira iha teritoriu laran tomak, hanesan, pre-eskolar, eskola báziku, eskola sekundáriu no mós eskola tékniku vokasional.

Nia dehan, eskola sira ne'ebé remata ona konstrusaun no hetan ona inaugurasaun, dadaun ne'e estudante sira uza ona ba prosesu aprendizajem.

Enkuantu, ba eskola sira ne'ebé konstrusaun seidauk hotu, ekipa sira sei nafatin esforsu hodi buka tuir nia problema sira.