Tuir komunikadu ne’ebé diariu ne’e asesu, apoiu ne’ebé fó la’ós atu rezolve problema kombustível iha terrenu, maibé insentivu ida hodi hein Governu nia intervensaun.

“Ne’e hanesan intensivu de’it maibé apoiu barak liu ne’e mai husi governu, tanba ne’e knaar Governu nian, Prezidente Repúlika, ajuda de’it tuir kbiit hodi aguenta atu hein Governu nia intervensaun,” hateten komunikadu ne’e.

Iha fatin hanesan, Padre Locateli hateten, apoiu ne’e disponibiliza tanba misionáriu sira laiha stock kombustível hodi fila rai komunidade nian ho apoiu ne’e bele hakmaan difikuldade koléjiu Fatumaca nian.

"Tinan tolu (3) ona mak ami preokupa kona-ba fila rai no irrigasaun tradisonál ba natar no toos sira, uluk sei diák, maibé ikus ne’e tratór sira susar loos tanba liu ona tinan 20, ikus mai mosu ho pandemia Covid-19, povu atu selu US$ 15 iha oras ida ba fila rai, ba povu susar,” haktuir Amu Locateli.

Entretantu, reprezentante Benefisiáriu husi suku 5, Vicente de Sousa Boavida nu’udar mós Xefe Suku Umo-Ana-Ulo, Postu Administrativu Venilale agradese Prezidente Repúblika, José Ramos Horta ne’ebé fó apoiu ba fila rai liu husi Pe. Locatelli, SDB ne’ebé servisu ho agrikultór sira, dezde tempu portuguéz to’o agora.

“Kombustível ne’e sei tau ba tratór hodi fila rai ba komunidade sira husi Suku Uailili, Gariuai, Bukoli, Loilubu, Umo-Ana-Ulo, Kairui Waimeana. Kada Suku, tratór 5 sei halo operasaun hodi fila rai durante fulan ida” tenik autoridade lokál ne’e.

Nune'e, Apoiu ne’e entrega direta husi Diretór Jerál Prezidénsia Repúblika, Domingos dos Santos Amaral  bá Padre Elígio Locateli.

Antes ne’e, Prezidente Repúblika ajuda mós finansiamentu ba Koléjiu Fatumaca, hodi hala’o missaun hodi ajuda komunidade agrikultura no hadi’a tratór.