Ema sira ne'ebé Prezidente Repúblika nomeia ne’e mak Faustino Godinho Gonçalves, Laura Soares Abrantes, Maria Dadi Soares Magno, Oscar Lima no Alcino Araújo Barris.
Membru konsellu sira ne’e sei hala’o sira nia knaar ho durasaun tinan 5, tuir mandatu Prezidente Repúblika nian.
Ne’e duni, dekretu Prezidente Repúblika hodi nomeia membru konsellu Estadu hanesan knaar ida husi Xefe Estadu ne'ebé hakerek ona iha Konstituisaun Repúblika Demokrátika Timor Leste, Artigu 86, alínea (n) katak “Foti membru lima ba Konsellu-Estadu”.
Nune’e, iha Konstituisaun artigu 90 pontu 2 alínea (e) hateten “Sidadaun lima ne’ebé Prezidente-Repúblika mak foti, ne’ebé la’ós membru husi órgaun soberania nian, ba períodu ne’ebé hanesan ho durasaun tempu ukun Prezidente-Repúblika nian.
Entretantu, iha artigu 91 Konstituisaun kona-ba “Kompeténsia, organizasaun no funsionamentu
Konsellu-Estadu nian” iha pontu (1) hateten katak Konsellu-Estadu maka bele: (a) Fó-sai kona-ba disolusaun Parlamentu Nasionál; (b) Fó-sai kona-ba demisaun Governu nian; (c) Fó-sai kona-ba deklarasaun funu no oinsá atu hala’o dame; (d) Fó-sai kona-ba kazu seluk tan ne’ebé iha Lei-Inan no, iha jerál, hato’o konsellu ba Prezidente-Repúblika bainhira nia hala’o ninia knaar, no bainhira nia husu karik.
