Diploma Parlamentu Nasionál ne’e kona-ba atu halo transferénsia ba Dotasaun Orsamentu Temporaria (DOT) husi Fundu Petrolíferu hodi asegura funsionamentu mákina Estadu.
Maski nune’e, diploma ne’e Xefe Estadu, Francisco Guterres ‘Lú-Olo’ haruka ona Tribunál Rekursu hodi fiskalizasaun preventiva antes halo promulgasaun.
Ne’e duni, Presidente PN, Arão Noe de Jesus, halo klarifikasaun ba públiku katak Prezidente Repúblika la veta, maibé halo knaar tuir artigu 49 Konstituisaun atu halo preventiva.
Tanba tuir lei, Xefe Estadu husu ba Tribunál Rekursu ho karakter urjénsia tanba fó loron sanulu atu halo apresiasaun, nune’e fó tempu loron haat ba PN atu halo resposta nu'udár autór ka proponente ba proposta ne’e.
Arão hatutan, PN kompromete iha to’o Sesta (3/8), sei halo klarifikasaun ba TR tanba konsidera proposta orsamentu ba transferénsia fundu petrolíferu ne’e importante atu hodi funsiona mákina estadu nian iha fulan rua nian.
Proposta orsamentu ne’ebé atu halo transferénsia husi Fundu Petrolíferu ne’e konsidera urjente, tanba ne’e PN iha loron hira nia laran halo ona aprovasaun hodi lori ba PR atu halo promulgasaun.
Desizaun ne’e kompeténsia Xefe Estadu ninian tuir lei, maibé bainhira orsamentu ne’e la pasa sei hamosu problema boot ba Estadu nia funsionamentu.
Entretantu, Peskizadór Asia Justice And Right (AJAR), Inocêncio Xavier hatete, situasaun situasaun agora povu sira komesa suspira ba sasán folin, inklui
Iha fatin hanesan, Diretór Luta Hamutuk, José Monteiro hatete, kuandu orsamentu ne’e maka la liu sei hanaruk tan krize ne’ebé povu afeta, tanba agora kapasidade kompara ba povu rasik laiha.
Hataan ba preokupasaun hirak ne’e Vise-Prezidente Bankada FRETILIN, Francisco Miranda Branco hatete, Tuir lei, kuandu osan iha tezouru governu la too ona tokon $200, tenke foti osan husi fundu mina-rai. Ne’e duni, iha dalan ne’ebé simples governu mai informa de’it ba PN bele halo ona transferénsia, la presiza dada naruk hanesan agora daudaun ne’e.
