Tuir Komunikadu Imprensa ne'ebé INDEPENDENTE asesu husi Palasiu Prezidensiál Bairu-Pite, Sábadu (24/02) katak, Prezidente Repúblika, José Ramos Horta hahú ona viajen ba Emiradus Arabes Unidus no Repúblika Demokrátika Povu Laos husi loron 24 fulan-fevereiru to'o loron 3 fulan Marsu.
Iha Abu Dhabi, Prezidente Repúblika lidera delegasaun Timor Leste nian ida hodi asina tratadu ne'e hodi formaliza Timor-Leste nia adezaun ba Organizasaun Mundial Komersiu (OMK) iha Konferensia Ministerial ba da-13 OMK nian. Iha loron 26 fulan Fevereiru, konferénsia ne'e sei aprova Timor Leste nia adezaun, tuir kedan ho serimónia asinatura.
Iha komunikadu ne’e mós hatete, Prezidente Repúblika sei halo diskursu ko'alia liu tán kona-ba kompromisu Timor Leste nian atu útiliza estatutu membru OMK nian hodi hadi'a infraestrutura, kapitál umanu no kapasidade administrativa hodi aselera kreximentu no diversifikasaun ekonómiku.
Nune'e, aprende husi esperiénsia husi membru pais menus dezenvolvidu sira seluk, TL fiar metin katak adezaun sei lori reformasaun eknonómika no serví tuir kompromisu atu kria kuadru ida ne'ebé sistemátiku bazeia ba regra sira.
"Sai membru OMK nian marka pasu boot ida ba Timor Leste hodi liberaliza komérsiu, integra an iha ekonomia globál, no fasilita asesu ba merkadu internasionál sira. Prezidente husu ba OMK atu kontinua fó asisténsia téknika no kapasitasaun hafoin adezaun hodi permite reformasaun sira ne'ebé aliña ho prinsípiu OMK nian," dehan Komunikadu Imprensa.
Prezidente Repúblika sei fó prémiu ba Diretor-Jeral OMK nian Ngozi Okonjo-Iweala ba nia apoiu durante prosesu adezaun Timor Leste nian.
Hafoin konferénsia ne'e, Prezidente Repúblika sei halo vizita estadu istórika dahuluk nian ba Laos husi loron 27 Fevereiru to'o 2 Marsu 2024.
Prezidente Repúblika sei hala'o sorumutuk bilaterál ho lider Laos sira inklui Prezidente Thongloun Sisoulith no Primeiru Ministru Sonexay Sipjandone, hodi hametin liután parseria no relasaun bilaterál entre Timor Leste no Laos ne'ebé estabelese ona dezde 2002.
Aliende, Timor Leste apresia tebes Laos nia apoiu ne'ebé konsistente ba TL nia kandidatura sai membru ASEAN no objetivu hodi hetan informasaun husi lideransa Laos ne'ebé esperiénsia barak nu'udar Prezidente ASEAN 2024
Timor Leste iha tempu ne’ebé hanesan negósia hela adezaun atu sai membru ASEAN, reforsa nia kompromisu ba integrasaun ekonómika rejionál no globál tuir enkuadramentu bazeia ba regra ba dezenvolvimentu sustentavel.
Prezidente Repúblika hein atu reforsa kooperasaun iha setór hotu-hotu durante vizita istórika dahuluk estadu nian ida ne'e, hodi reforsa relasaun fraterna entre Timor Leste no Laos.
