Durante sorumutu ne’e, Xefe Estadu hato’o apresiasaun boot Timor-Leste nian ba lideransa Prezidente João Lourenço nian iha Uniaun Afrikana, liuliu hodi foti-aas Angola nia esforsu proativu sira hodi promove dame, estabilidade no seguransa iha kontinentu Afrikanu laran.

Prezidente Ramos-Horta mós foti-aas afinidade istórika no polítika ne’ebé kle’an entre Timor-Leste no Angola, ne’ebé bazeia ba sira-nia luta hanesan ba independénsia no konsolidasaun Estadu de Direitu ne’ebé hala’o hela.

Xefe Estadu reafirma importánsia multilateralizmu no koperasaun entre nasaun sira ne’ebé defende valór komún sira, hanesan soberania nasionál, autodeterminasaun povu sira-nian no promosaun direitus umanus iha mundu tomak.

“Hateke ba oin, parte rua ne’e manifesta interese boot hodi reforsa relasaun bilaterál no hametin koperasaun Súl-Súl iha domíniu diplomátiku, ekonómiku no kulturál. Líder sira mós rekoñese Comunidade dos Países de Língua Portuguesa (CPLP-sigla portugés) nu’udar plataforma vitál ba konsertasaun polítiku-diplomátika, hodi emfatiza ninia papél iha promosaun lian portugés no defeza ba interese komún sira iha fórum multilaterál internasionál sira,” Dehan PR Horta liu husi Komunikadu ne’ebé Media INDEPENDENTE asesu husi Média PR, Tersa (24/02).