Desizaun ne’e foti, bazeia ba Konstituisaun Repúblika Demokrátika Timor-Leste, artigu 85, fó indultu nudar kompeténsia eskluziva Prezidente Repúblika nian hafoin rona Governu.

Fó indultu no komutasaun pena tenke halo tuir, ninia fundamentu, nomeadamente ezijensia pessoais, umanitárias, familiares no sosiais husi kondenadu no ezijensia ba resosializasaun, komportamentu prizional no esforsu ba reinsersaun sosial. Haree mós ba komportamentu prizional no esforsu ba reinsersaun sosial husi rekluzu no razoins umanitaria ho kazu atu impoin.

“Tuir tradisaun prezidensial, iha okaziaun Loron Proklamasaun Independénsia, Prezidente Repúblika, iha ámbitu haktuir iha poderes konstituisionais no husi proposta Governu fó indultu ba rekluzus na’in-11 ba krimes ne’ebé konsideradu menores,”dehan Xefe Kaza Sivil Francisco de Vazconçelos,  iha komunikadu ne’ebé Online INDEPENDENTE asesu, sesta ne’e (26/11).

Entretantu, rekluzus na’in-11 ne’ebé hetan indultu mak, Albertino Freitas Magno, Atanásio Ribeiro Belo, Domingos Gusmão Marques, Gerónimo Marques, Luis Marques, Mateus Boavida Marques, João Guterres, Abreu Ramos da Costa, Júlio Ximenes, Armindo Martins no Eliza da Conceição Gonçalves Noronha.

Asistente Editor: Saturnina da Costa