“Aktu ida ne’e viola KRDTL Artigu 99 (3), Rejimentu Parlamentu Nasional Artigu 17 kona-ba Kompetensia Prezidente Parlamentu Nasional,”dehan Arão, konferensia impresa, Parlamentu Nasionál, Segunda ohin (18/05).
Konstituisaun Artigu 99 (3) hateten momoos katak Parlamentu Nasional Reuni Ordinariamente tuir Konvokasaun Prezidente Parlamentu nian.
Nia esplika, vise-Prezidente, Maria Angelina Lopes Sarmento obriga Xefe Divizaun Apoiu Plenária (DIPLEN), atu ajenda no prepara materia ba plenária iha loron 18 fulan-Maiu 2020.
“Aktu ida ne’e viola Rejimentu Parlamentu Nasionál artigu 22 kona-ba kompeténsia Vise-Parlamentu Nasionál nian. Vise Prezidente Parlamentu Nasionál so bele ezerse PPN nia funsaun bainhira hetan delegasaun kompeténsia husi PPN tuir Rejimentu Artigu 22 nu. 3,” dehan Arão.
Nia dehan, prosedimentu normal iha Parlamentu Nasional, Prezidente Parlamentu maka iha kompetensia atu konvoka konferensia lideres Bankada hodi aprova ajenda ba plenária.
Bainhira lideres bankada sira aprova ona ajenda maka Prezidente halo despaixu ba DIPLEN prepara ajenda ba plenária, se laiha reuniaun líder bankada maka plenária mós laiha.
Xefe DIPLEN, Quintiliano Ase mós konsidera prosesu ne’ebé Vise- Prezidente Parlamentu Nasionál, Maria Angelina Sarmento halo ne’e kontra aktu normal funsionamentu Parlamentu Nasionál, nunee devolve fila fali despaixu refere ba Gabinete Vise Prezidente nian.
Tanba la konsege obriga DIPLEN, Vise-Prezidente halo despaixu ba Sekretáriu Jerál atu ajenda plenaria ba loron 18 fulan-Maiu 2020.
Sekretáriu Jerál Parlamentu Nasionál divolve despaixu husi Vise- Prezidente tanba konsidera despaixu refere kontra LOFAP Artigu 7.
LOFAP Artigu 7 hatete katak tenke iha delegasaun kompeténsia husi Prezidente ba Vise Prezidente Parlamentu ho eskrita antes Vise Prezidente bele toma funsaun Prezidente Parlamentu nian.
Tuir observasaun INDEPENDENTE Online iha Parlamentu Nasionál nota katak Bankada partidu PLP, FRETILIN, no KHUNTO hahú kansela malu hadau Meja PN.
Vise-Presidente Parlamentu Nasionál, Maria Agelina sae ona ba meja PPN nian maibé deputadu CNRT sira la fó fatin nunee oras ne’e sei haksesu malu hela.
