Porta-voz Posko Komite Popular, Carlito da Costa informa katak, Posko Komite Popular ne’e estabelese ona iha Estadu Emerjensia ba dala-XI bainhira aplika serka sanitária iha Munisipio Bobonaro no Covalima.
Haree ba situasaun ida ne’e difikulta tebes ba estudante Covalima no Bobonaro hodi halo movimentasaun ba-mai tanba Governu bandu transporte hotuhotu halo movimentu ba-mai husi Dili ba Covalima no Bobonaro, durante fulan ida.
"Bazea ba serka sanitária iha Munisipio Bobonaro no Suai iha fulan kotuk liu ba movimentu solidariedade harii posku ida iha kampaun HAK no AJAR hodi akumula apoiu husi parseiru sira. Membru mak husi ONG Rede Defensor Direitus Umanus no individu sira, membru HAK ho ativista sira ne’ebé koopera voluntariamentu,"dehan Carlito ba jornalista Online Independente, hafoin fahe aihan ba estudante sira husi Bobonaro no Covalima, iha Farol, Dili, Kinta ohin (1/4).
Husi estabesimentu posko ne’e, hetan kontribuisaun foos tonelada 3, mina goreng 250 litrus, supermi kaisa 60, manu tolun rak 12, sabaun kaisa 2, no masin kaisa 1.
Total nesesidade bazika ne’e, Carlito informa katak, antes ne’e fahe ona ba estudante benefisiaria sira husi Munisipio, inkluindu RAEOA Oekuse, iha ambitu serka sanitária. Nia dehan, aihan sira ne’ebé posko prepara hotu ona.
Entretantu Posko Komite Popular husu Governu atu fó atensaun ba estudante sira husi Munisipio sira tanba maioria husi Munisipio sira. Sira komesa hamlaha dadaun ona husi impaktu serka sanitária ne’ebé Governu aplika ba Munisipio tolu hanesan Dili, Baucau no Vikeke, ida ne’e afeta tebes ba estudante sira iha Dili laran.
