Informasaun husi fonte importante husi partidu koligasaun Aliansa Mudansa ba Progresu (AMP), Xanana Gusmão indijita ona Taur Matan Ruak atu asume kargu Primeiru Ministru.
Maski nune’e, sei iha prosesu diskusaun entre lider masimu partidu koligasaun AMP nian. Hanesan mós ho kargu Prezidente PN, ne’ebé kontinua lao iha debate nia laran.
Kona-ba kargu Prezidente PN, Koordenadór Jurisdisaun AMP, Arão Noe de Jesus hatudu ona nia prontidaun atu asume bainhira hetan konfiansa husi lider másimu sira.
Nia esplika, AMP iha konsellu diretiva nasionál, tanba ne’e sira mak sei define entre deputadu 34 ne’e ida (1) maka bele kandidata-aan ba Presidente PN, Vise Presidente PN, Sekretaria meza no ba prezidente komisaun espesializada sira.
Atu prienxe fatin importante sira ne’e, kuadru ida-idak iha AMP atu eleje nia-aan ba fatin ne’ebé nia hakarak, maibé kompeténsia ba estrutura sira atu bele define hodi ba ka’er responsabilidade iha fatin sira ne’ebé definidu ona.
“ha'u la kandidata aan, maibé ha'u ema ida ne’ebé prontu atu servisu. Ha'u lakohi atu hatudu-aan hodi dehan atu ba kaer ida ne’e-ida ne'ebá”, dehan nia, iha Sede CNRT, horisehik.
Arão hatutan, servisu iha partidu ne’e órgaun kolejiál, tanba ne’e desizaun hotu-hotu koletivu, prosesu sira ne’e kabe hotu ba konsellu diretiva nasionál hodi deside.
FRETILIN Firme ho Opozisaun
Tribunál Rekursu anunsia ona rezultadu apuramentu ba eleisaun antesipada, ne’ebé partidu koligasaun AMP hetan vitória hodi lidera VIII Governu.
Proklamasaun ba rezultadu ne’e hetan akordu husi Juis Koletivu husi Prezidente Tribunál Deolindo dos Santos, Juis Guilhermino da Silva ho Juiza Jacinta Correia.
Iha rezultadu ne’e partidu koligasaun AMP hetan kadeira 34, FRETILIN kadeira 23, Partidu Demokrátiku (PD kadeira lima (5) no koligasaun FDD kadeira tolu (3).
Iha Rezultadu ne’e totál votante iha 12 Maiu 2018 iha eleisaun antesipada rihun 784.286, nune’e eleitór votante 635.116 ne’ebé korresponde 80.98%, votu válidu 624.525 ho porsentu 98.44%, votu branku 2.998 ho porsentu 0.47%, votu nulu 7.548 ho porsentu 1.19%.
Iha fatin hanesan, Prezidente Komisaun Diretiva Nasionál AMP, Fidelis Magalhães Leite hateten, Tribunál valida ona rezultadu apuramentu nasionál. Ne’e duni sira sei kumpre konstituisaun RDTL, bainhira lejizlatura hahú hafoin Jornál da Repúblika anunsia.
Nia dehan, AMP prontu Lidera VIII Governu hodi funsiona mákina Estadu para rezolve dezafiu ne’ebé povu Timor-Leste enfrenta, durante períodu 2018-2023.
Nune’e, Membru Comite Central da FRETILIN (CCF), Dulce Vitor hateten, partidu FRETILIN ne’ebé hetan segundu mais votadu prontu ba opozisaun forte tuir konstituisaun RDTL.
FRETILIN kontinua luta nune’e prepara-aan luta períodu 2023, nune’e hetan vitória atu ukun povu ho nasaun. Tanba ne’e, FRETIL sei tau-aan nu'udar opozisaun forte hodi responde kompromisu partidu avansadu liu husi plenária PN.
