Hanesan públika iha media Indonezia nian, to’o ohin loron polisia Yogyakarta foin konsege kaptura suspeitu ida ho inisial MTN alias DN sidadaun Timor Leste. Suspeitu ne’e hetan kaer iha nia subar fatin iha area Madiun, Jawa Leste.

Ba suspeitu sira seluk, Diretór Reskrimum Polda DIY (Daerah Istimewa Yogyakarta) Komisariu Polisia Hudi Utomo hatete, nia parte hasoru difikuldade balun atu kaptura suspeitu sira seluk tanba balun halai fila ona ba Timor Leste.

“Iha difikuldade balun, iha suspeitu balun ne’ebé deskonfia fila ba Timor Leste,” deklara Kombes Pol Hadi hanesan públika husi detik.com iha Sesta (26/07).

Bazeia ba rezultadu investigasaun, polisia deskonfia suspeitu hotu-hotu nu’udar sidadaun Timor Leste.

“Tanba Timor Leste nasaun estranjeiru, klaru presiza koordenasaun no prova ne’ebé kroat. Inklui mós prosedura oinsa maneira kaptura suspeitu iha estranjeiru,” Hadi esplika.

Aleinde ne’e, nia hatutan, kazu ne’e konsidera difesil uitoan tanba iha fatin akontesimentu (Tempak Kejadia Perkara-TKP) tolu. Dahuluk mak fatin ema foti vitima. Daruak mak fatin vitima hetan torturasaun, fatin rua ne’e iha area Banguntapan, Bantul. No ikus liu mak fatin hetan mate-isin.

“Ida ne’e ba ami dezafiu no obrigasaun atu bele deskobre. Ami mós husu ba see de’it mak iha informasaun atu informa mai ami,” dehan nia.

“Deskonfia autór fila ona ba nia nasaun, maske nune’e ita sei esforsu, ita ho formal sei koordena ho polisia (PNTL) iha ne’ebá. Iha tempu hirak liu ba Embaixadór Timor Leste hasoru ona ita,” nia hatutan.

Polisia DIY kaptura ona suspeitu ida ho inisial MTN alias DN ne’ebé deskonfia nu’udar ema ne’ebé lori mate-isin husi fatin torturasaun iha Banguntapan, Bantul hodi soe iha Cemorosewu, Suku Ngancar, Postu Plaosan, Munisipiu Magetan.

Bosco nia mate-isin hetan iha 14 Jullu 2019. Liu husi prosesu naruk, konsege identifika Bosco nia isin ne’ebé iha altura ne’ebá dodok ona.