Segundu Komandante PNTL Munisípiu Dili, superintendente asistente Euclides Belo hateten, servisu investigasaun Kriminál simu ona keixa husi vítima sira kona-ba akontesimentu ne’e.

“Sira mai fó ona informasaun ba polisia kona-ba ema ne'ebé baku sira, maibé sira ladún koñese didi'ak suspeitu sira ne’e”, dehan nia, iha edifísiu Komandu PNTL, Kaikoli, hodisehik

Euclides realsa, maski husi informasaun metade ne'ebé vítima sira hatama, maibé esforsu komandu nian hamutuk ho polisia komunitaria konsege deteta suspeitu sira.

Tanba ne’e, iha ona ekipa ida mak halo daudaun servisu rekolla dadus ba kazu ne’e.

Kazu ne’e sériu, tan ne’e orienta ona ba PNSIK tenke formaliza lalais keixa ne'ebé vítima sira hato’o. Tanba krime hasoru ema idade minoria ne'ebé hala’o hela servisu buka moris hodi sustenta eskola no nesesidade uma laran.

Nune’e, komandu mós orienta ona ba eskuadra Don Aleixo atu halo nafatin patrullamentu área sira ne’ebé risku para bele fó nafatin protesaun ba maluk sira husi Oekusi atu hetan liberdade hala’o sira-nia atividade.

Entretantu, portavós Estudante Universitáriu RAEOA no estudante umanista Timor, José Raul da Silva hatete, relasiona ho polítika iha rai laran labarik o menór-idade sira ne’ebé inosente sai ona vítima.

Akontesimentu ne’e iha Rai-Kotu, grupu deskoñesidu balun lori partidu nia-naran hodi halo agresaun fíziku hasoru labarik menór-idade ne’ebé fa’an fa'an na’an kabuar no mantolun, iha Dili laran.

La’ós ne’e de’it, grupu balun lansa ameasa iha média sosiál hasoru komunidade RAEOA dehan atu labele tama mai iha Dili.

Aktu terrór psikolojia komunidade Oekusi nian halo sira tau labele fila mai hodi halo sira nia estudu no balun ta'uk halo servisu hanesan badaen no atividade komersiál iha Dili laran.

Iha fatin ketak, Diretór Ezekutivu AJAR, José Oliveira hatete, karik kazu ne’ebé ema deskoñesidu balun lori partidu nian naran halo agresaun fíziku hasoru labarik menór-idade ne’e grave tebes, presiza tau atensaun sériu.

“Lider partidu sira mós tenke tau atensaun ba ema sira ne’ebé halo intimidasaun ba maluk Oekusi-oan sira”, dehan nia.

Kazu sira hanesan viola ona direitu umanu. Tanba ne’e, labele tolera, karik lori partidu ida nia naran ne’e sei hatún kredibilidade partidu iha públiku.