Komisaun B Parlamentu Nasionál ne’ebé trata asuntu Negosiu Estranjeiru, Defeza, no Seguransa halo inspesaun ba Kuartél Jerál PNTL.

Prezidente Komisaun B, Domingos Augusto ‘Deker’ subliña, nia parte sei hala’o hela nia funsaun fiskalizasaun no seidauk bele fó sai konkluzaun ba públiku.

"Ami seidauk fó sai buat ida tanba ami seidauk iha evidénsia. Investigasaun sei la'o hela," dehan durante vizita Kuartel Jeral PNTL, Sesta (13/02).

Nia rekoñese keixa públiku sira, partikularmente husi partisipante selesaun sira ne'ebé la pasa iha faze médiku. Maibé, Komisaun B hili suspensaun temporáriu, envezde kanselamentu totál, atu permite hadi'a no kontinuasaun prosesu nian.

Tuir nia, PN hala’o de’it fiskalizasaun no labele interfere ho desizaun komisaun rekrutamentu nian tanba prinsípiu separasaun podér. Komisaun B mós rekomenda atu PNTL evita favoritizmu no ligasaun família hodi garante transparénsia.

Iha fatin hanesan, Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa, desizaun Governu liu hosi Konsellu Ministru deside ona fó tempu hodi hadia prosesu rekrutamentu liu-liu estabelese komisaun foun.

Komisaun foun ne’e, nia dehan, sei envolve mós entidade internasionál, hanesan Polísia Australianu no Portugeza, maibé ne’e deside iha Ministru Interior, Francisco da  Costa Guterres, nia kompeténsia.

“Rekrutamentu ne’e ba Timoroan hotu, la’ós ba de’it António nia oan no José nia oan, família ida, lae, sé Timoroan oan hotu, ita bele hatete katak see de’it bele partisipa ka bele kompete iha prosesu ne’e,” katak nia.

PLP: Indikasaun Forte ba Nepotizmu

Kontrariu ho Komisaun B, Prezidente bankada PLP, Deputada Maria Angelina Sarmento, avalia katak públiku haree ona indikasaun maka’as kona-ba irregularidade dezde anunsia lista finál.

Nia deklara katak kandidatu susesu balu mak oan ka parente sira husi ofisiál polísia sira, no kandidatu balun la pasa iha teste fíziku maibé avansa nafatin ba teste tuir mai.

PLP afirma mós katak kandidatu sira ne'ebé halo protestu hasoru malu ona ho Primeiru Ministru, Kay Rala Xanana Gusmão, no fó prova, hodi halo Governu deside suspende prosesu rekrutamentu no envolve polísia Australianu ho Portugés.

Nia hatutan, Provedoria Direitus Umanus no Justisa simu keixa lubuk ida no husu atu parlamentu halo inkéritu hodi garante transparénsia.

Editor: Jorgino dos Santos