Xefe Estadu Maiór Jenerál F-FDTL, Lere Anan Timur, konsidera lider arte-marsiál sira maka autór intelektuál no autór materiál ba membru sira.

Nia dehan arte-marsiál komesa reativa fila-fali maibé lei númeru 5/2013 kona-ba taka arte-marsiál no arte rituál sira hanesan PSHT, Kera Sakit, KORK no 77 kontinua vigora.

“Uluk ami iha Tasi-Tolu ha’u bolu responsavel arte-marsiál PSHT, KORK no 77, ami halo kompromisu verbál ida dehan aban bainrua arte-marsiál ne’ebé halo muturabu ami kaer, temi dehan ami husi PSHT, KORK ka 77 ne’e ami ba kaer nia lider”, tenik nia, iha Palásiu Prezidensiál, Bairru-Pité, horisehik.

Lere esplika lei númeru 5/2013 bandu arte-marsiál nia atributu kona-ba arma branka ninia, maibé Tribunál mós la koopera ho elementu seguransa ninia, tanba Polísia kaer membru arte-marsiál ho atributu kaer rama ambon, tribunál husik livre de’it.

Tanba ne’e, Tribunál mós tenke koopera ho instituisaun seguransa, se lae sira servisu saugate, ema kolen de’it kalan hadeer la’o kaer ema arte-marsiál ho arma branka ba entrega dehan la sala, ne’e labele akontese.

Ne’e duni, Lei númeru 5/2013 ne’e vigora nafatin, sé de’it maibé polísia la tauk atu atua, nia fó brani nafatin halo servisu tuir lei.

“Ha’u sei tuur hamutuk ho Komandante Júlio ha’u dehan arte-marsiál PSHT ba kaer nia boot Timor nabeen? Depois ita haree took se KORK, ba kaer Naimori nia biar partidu KHUNTO nia ba kaer tiha Timor nabeen? Mak ita haree took entaun ita halimar ba malu”, tenik nia.

Nune’e Komandu F-FDTL ho Komandante PNTL sei bolu tan arte-marsiál nia-lider sira, fó hatene lei númeru 5/2013 ba sira. La'ós hanesan polítiku sira dehan rejista, entaun hasai tiha lei ne’e atu ba rejista, maibé bainhira lei ne’e sei iha la rejista.

Bainhira atua sira komete krime polísia kaer, se nian arte-marsiál husi ne’ebé nian KORK, 77 ka PSHT nian ba kaer nia-ulun lori mai kesi mós di’ak, bainhira komete krime ne’e futu.

Lere fó ezemplu hanesan soldadu polísia na’in rua tiru mate joven na’in tolu no hakanek na’in lima iha Kuluhun ne'ebá ne’e, agora Komandu maka lori todan maibé tanbasá maka arte-marsiál nia-lider labele lori todan, tenke lori todan.

Xefe Estadu Preokupa Situasaun Nasionál

Entretantu, Prezidente Repúblika (PR), Francisco Guterres ‘Lú Olo’ ho Xefe Estadu Maiór F-FDTL, Majór Jenerál Lere Anan Timur, preokupa situasaun iha nivel nasionál.

Lere dehan, Xefe Estadu preokupa ho situasaun ne’ebé akontese iha fatin-fatin maka rona ema sona malu, oho malu no tau liman ba elementu seguransa ninian.

“Preokupasaun Prezidente Repúblika hanesan mós ha’u nia preokupasaun,” tenik nia.

Nia hatutan, Prezidente Repúblika mós dehan fó ánimu nafatin, fó brani nafatin PNTL labele dezanima, aparellu Estadu ninian ne’e hanesan Komandante Júlio dehan tasi bele sa’e, Timor bele nabeen, maibé PNTL iha nafatin.