Iha votasaun ba proposta númeru 14 ba alterasaun ba proposta sosa karreta Pajero Sport 30 ne’ebé prevee iha orsamentu privativu Parlamentu Nasionál (PN), deputadu na’in 38 vota a favor, na’in ida kontra no na’in 20 abstensaun.

Ho rezultadu votasaun ida ne’e, signifika deputadu sira iha PN vota kontra atu sosa karreta foun.

Molok tama votasaun, proponente proposta númeru 14, deputadu Bankada Fretilin, Mariano Fatubai Mota hatete, nia parte halo proposta alterasaun ne’e tanba durante ne’e halo observasaun katak maioria deputadu mós la konkorda atu hola karreta iha sesta lejizlatura.

“Tanba ne'e mak proponente ho hanoin ida atu redus orsamentu ho montante millaun $1.950, ne'ebé mak aloka atu ba sosa 30 ba deputadu sira sesta lejizlatura,” dehan deputadu Marito, iha Parlamentu Nasionál, Sesta (11/11).

Tan ne’e, nia hatutan, proponente hanoin halo proposta alterasaun hodi ajusta fali ba programa seluk ne’ebé trasa tiha ona.

“Ne'ebé iha programa ida atu aloka rihun $771,508 ba boa-governasaun instituisionál no sub programa jestaun instituisionál, atividade atu apoiu estabelisimentu no funsionamentu tribunais superiór,” katak nia.

Nia haktuir, orsamentu ne'e proponente ho hanoin katak envesde atu sosa karreta, di’ak liu Parlamentu Nasionál instala tiha uluk nia Tribunál ne'ebé mak Parlamentu Nasionál aprova tiha ona, maibé la preve nia orsamentu.

“Segundo, atu aloka rihun $178,492 atu halo selebrasaun akordu entre Parlamentu Nasionál ho Dewan Perwakilan Rakyak Republik Indonézia no ida fali montante millaun $1 ne'ebé mak atu aloka ba fundu infra-estrutura iha atividade foun ne'ebé mak atu konstrui edifisiu Parlamentu Nasionál, ne’ebé iha Dezembru presiza ona halo estudu no dezeñu,” nia relata.

“Iha parte seluk ita haree mós públiku kestiona maka'as Deputadu sira sosa karreta, ida ne'e mak proponente nia hanoin,” nia dehan.

Iha fatin hanesan, Prezidente Komisaun C no atuál deputada Bankada Fretilin, Maria Angélica Rangel hatete, molok ne’e Parlamentu Nasionál deklara tiha ona katak sei la sosa karreta.

“Maibé hakarak dehan katak livru lista kompra iha governu nian millaun $19.9 atu hola akizisaun bens kapitál no iha dotasaun todo Governu iha livru sosá karreta millaun $2 kestionavel. Ema kestionavel órgaun soberania ida ne'e nia dignidade, ema tolok Deputadu sira rahun no ita laiha pozisaun markante, ita hakfodak halo deklarasaun ida hasai, tanba sosiedade hakilar,” nia dehan.

Nia fundamenta, maibé sosiedade la haree ba iha livru sira ne'e ho didiak, la’ós Parlamentu Nasionál mak hakarak sosa karreta tinan oin, maibé iha livru orsamentu governu mós prevee sosa karreta.