Deputadu Noel da Silva hateten, informasaun ne’ebé hetan katak karreta rua ne’ebé funsionáriu públiku balun uza ba iha Kupang ne’e lori família sira ba asiste serimónia ida iha ne'ebá.

Karreta rua ne’e deskonfia husi Institutu Jestaun Ekipamentu (IGE) ho xapa matríkula 03-830 G no no 04-160 G.

“Husu atu halo investigasaun ruma ba funsionáriu públiku ne’e tanba lori fali karreta estadu nian ba hala’o atividade privada nian to’o iha Indonézia”, dehan nia, iha Uma Fukun PN, horisehik.

Deputadu ne’e hatutan, asuntu ne’e presiza investiga atu hatene loloos sira lori karreta ba Indonézia ne’e hetan lisensa ruma ka lae, karik laiha tenke prosesa tuir lei haruka.

Nia hateten, governu tenke sériu hodi halo investigasaun, tanba ne’e parte ida halakon mós osan estadu nian bainhira karreta ne’e hetan avaria ruma sei lori osan povu nian mak ba hadi'a.

Iha fatin hanesan, Sekretáriu Estadu Komunikasaun Sosiál (SEKomS) Juvinal Mericio dos Reis hateten, ajente estadu balun ne’ebé lori karreta estadu tama to’o Indonézia dehan ba halo atividade privadu ne’e presiza tau atensaun duni.

Governu mós konkorda atu bele halo investigasaun hasoru pesoál funsionáriu ne’ebé utiliza patrimóniu estadu ne’e.