Enkuantu, durasaun husi renovasaun estadu emerjénsia ba loron 30 ne'e, hahú husi tuku 00:00 loron 30 fulan-Outobru no sei termina iha tuku 23:59, loron 29 fulan-Novembru tinan 2021.

Prezidente Parlamentu Nasionál (PPN), Anicetu Longuinhos Guterres, hateten, Parlamentu Nasional autoriza renovasaun ba deklarasaun estadu emerjénsia ba dala-19 ne’e, ho rezultadu votasaun nominál a-favór 43, kontra 5 no abstensaun 12.

“Lei autorizasaun estadu emerjénsia aprovadu, espera Governu implementa ho di’ak,’dehan nia iha PN, tersa ne’e (26/10).

Prezidente Parlementu, husu ba Governu atu iha kolaborasaun ho parte saúde hodi hasa’e kobertura vasina ba komunidade sira.

Razaun Prezidente Repúblika husu autorizasaun ba Parlamentu Nasionál tanba, situasaun Covid-19 iha Timor-Leste, no haree ba kazu ativu konfirmadu to’o loron 25 fulan-Outubru hamutuk 52 husi total 19.770 desde inisiu rejista kazu no ema na'in 121 mate ho Covid-19.

Aliende, dadus mundial ne'ebé fó sai husi Organizasaun Saude Mundial (OMS) rejista kazu infensaun SARS-CoV-2 hamutuk 244.000.000 Covid-19 no 4.796.000 mate ho Covid-19.

Entretantu, mensajen Prezidente Repúblika Francisco Guterres ‘Lú Olo nian, propoin ba Parlamentu Nasionál atu halo estensaun estadu emerjénsia ba loron 30 tán iha territóriu nasionál ho parsialmente suspende sirkulasaun internasionál, liberdade sirkulasaun, direitu reuniaun no manifestasaun, liberdade kultu (culto) inklui limita no proibisaun realizasaun selebrasaun relijioza.

Nune’e, mós direitu ba edukasaun inklui halo suspensaun temporária ba prosesu no atividade ensinu aprendizajen ho rejime prezensiál, direitu propriedade no inisiativa ekonómika privada. Aleinde, direitu rezisténsia sira sei impede hosi autoridade públika bainhira sidadaun sira la kumpre medida ezekusaun.

Molok ne’e, Prezidente Repúblika dekreta EE ba dala-18 hahú iha tuku 00-00 loron 30 Fulan-Setembru no sei termina iha tuku 23:59 loron 29 Fulan- Outobru tinan 2021.

Asistente Editor: Saturnina da Costa