Koordenadór MUTL Kampu Manifestasaun, Noe Bernardino Ximenes hateten, MUTL hasoru Prezidente Repúblika atu ko’alia kona-ba asuntu polémika sosa karreta foun no kontinua uza karreta tuan ne’ebé eis-deputadu sira uza.

Nia dehan, depois audiénsia finaliza, iha konkordánsia ho Prezidente Repúblika katak aktu ne’ebé Prezidente ho Membru Parlamentu Nasionál halo ne’e kontra ona lei tanba, lei ida seidauk mate maibé sira hamosu fali lei ida hodi sosa fali karreta foun.

Nune’e, orsamentu agora prosesu debate tanba ne’e maka objetivu mai hasoru malu ho Prezidente Repúblika bele tetu antes halo desizaun atu bele promulga OJE 2019 tanba osan hola karreta foun tau iha orsamentu 2019 ninia.

“Desizaun hotu-hotu ne’ebé la nesesáriu ba povu nia interese, la favorese ba povu nia moris di’ak, veta. Se Prezidente Repúblika iha oportunidade atu veta hodi lori fila-fali ba PN halo desizaun ida ne’ebé ekilíbriu ba povu hotu”, dehan Noe, iha Palasiu Prezidensiál, Bairru-Pité, Dili, horisehik.

Nia hatutan, tan ne’e hasoru malu ho Prezidente Repúblika atu bele tetu enkuantu Parlamentu Nasionál hatún ona despaxu labele sosa karreta, maibé sira kontinua sosa karreta. Ne’e duni, kompeténsia ida maka Prezidente Repúblika tenke uza atu bele halo desizaun ne’ebé justu ba desizaun ne’ebé órgaun soberania sira halo.

Manifestasaun Termina 20 Dezembru

Entretantu, asaun pasifika ne’ebé MUTL halo hodi kontra desizaun sosa karreta ne’e, tuir karta ne'ebé hatama ba PNTL hodi halo seguransa ba manifestasaun ne’e laiha data limitadu, maibé sira deside sei remata iha (20/12), nune’e, sei kontinua fali iha (7/1/2019).

“Ami sei la rona ema sé de'it atu hapara atividade MUTL nian, tanba MUTL mai ho prinsípiu tolu akadémiku nian hanesan edukasaun, peskiza no dedikasaun”, dehan Portavós MUTL, Marçal dos Santos Pereira, iha Kampus Liseu, horisehik.

Tuir nia, MUTL konsidera deputadu ne'ebé reprezenta povu iha uma fukun Parlamentu Nasionál laiha polítika di'ak atu lori povu ba moris dignu, tanba sira tau interese privadu aas liu duke interese komum.

OJE 2019 ne'ebé parlamentu nasionál aprova tokon $16.145, ne’ebé inklui sosa veíkulu ba deputadu sira MUTL fiar katak Xefe Estadu sei veta, tanba OJE ne’e tanba la fó benefísiu ba povu maibé ba de’it ema individu.