Durante vizita, Xanana Gusmão apresia tebes ho espozisaun artezanatu no produtu lokál sira, ne’ebé konsideradu nu’udár plataforma estratéjiku bá promosaun rikeza kulturál no produtu Empreza Mikro, Ki'ik no Médiu (EMKM) sira nian bá komunidade internasionál.
“Espozisaun cultural sira hanesan ne’e, sai nu’udar meiu ida atu habelar kolaborasaun no hatudu potensial husu Repúblika Tatarstan nian ba mundu. Apresia teb-tebes ho produtu hot-hotu ne’ebé iha no Timor-Leste hein oportunidade iha futuru,” PM Xanana hateten.
Sentru Loja Universál iha Kazan revitalizadu hanesan Sentru bá Artezanatu Úniku, regularmente sai uma-na'in bá espozisaun oioin no programa kulturál sira ne'ebé hetan apoiu hosi Governu Repúblika Tatarstan nian.
Governu lokál kolabora ho artezanatu lokál sira hodi organiza Espozisaun Artezanatu no Kultura Populár hodi Hatudu obra arte lokál, tradisaun sira, no projetu sira ne'ebé dokumenta valór kulturál tradisionál sira Tatarstan nian.
Iha mós Espozisaun Downy Shawl nu’udár Projetu kolaborativu ida ne'ebé hetan apoiu hosi governu hodi hatudu artezanatu soru no textil nian.
Espozisaun Samovar ne’ebé hatudu kolesaun samovar tradisionál sira. Espozisaun Moda no Dezeñu Lokál ne’ebé hatudu obra sira no kolesaun moda nian hosi Uniaun Dezeñadór sira Tatarstan nian.
Aleinde espozisaun sira, sentru ne'e mós organiza feira artezanatu sira hanesan bazar sira, atrasaun muzikál sira hosi Orkestra Infantil Tatarstan nian, no projesaun sira hosi filme kulturál sira.
Iha mós Espozisaun "Made in Tatarstan" nu’udár espozisaun estratéjiku ida ne'ebé hatudu potensiál industriál tomak, teknolojia aas, no kapasidade esportasaun sira Repúblika Tatarstan nian.
Espozisaun ne'e dalabarak hala'o ho baze rotativa hodi koinside ho fórum internasionál bo’ot sira no Simeira Estadu sira iha rejiaun.
Espozisaun ne'e normalmente destaka seitór prinsipál sira, hanesan Enerjia no Petróleu hodi hatudu teknolojia avansadu sira iha esplorasaun no prosesamentu.
Aeroespasiál no Automotivu maka hatudu inovasaun sira iha fabrikasaun veíkulu no aeroespasiál.
Vizita ne’e Primeiru-Ministru, Xanana Gusmão akompaña hosi Xefe Repúblika Tatarstan, Rustam Minnikhanov.
