Tuir komunikadu ne’ebé Online INDEPEDENTE asesu iha Pájina GPM katak, Xefe Governu apela nafatin bá komunidade iha Dili atu iha konsiénsia tomak, kontribui halo Dili moos no livre hosi lixu, liu-hosi so’e foer iha lixu-fatin ne’ebé Governu prepara ona, nune’e hafásil ekipa responsável raut lixu nian bele transporta ho lalais bá lixeira públika Tibar.
Nune'e iha loron 23 Fulan Dezembru tinan 2024, Primeiru-Ministru (PM), Kay Rala Xanana Gusmão akompaña hosi Ministru Obras Publikas, Samuel Marçal mobiliza funsionáriu hosi Ministériu Obras Publikas (MOP), Ministériu Edukasaun (ME), Instituto de Gestão de Equipamentos e Apoio ao Desenvolvimento Infraestruturas, Instituto Publico (IGEADI, I.P), ekipa Movimento Brigada Xanana (MBX) no Ministériu sira seluk tán hala’o limpeza no raut lixu iha Dili laran.
Limpeza jerál ne’e hahú iha tuku 10:00 dader to’o tuku 17:00 ne’ebé fahe ba grupu rua, grupu ida lidera hosi Kay Rala Xanana Gusmão iha Dili parte Lorosa’e nian mak hanesan área Praia dos Coqueiros, Bidau, Lecidere, Caicoli, Merkadu Lama, Vila Verde no fatin seluk tán.
Iha Dili parte loro-monu nian lidera hosi Samuel Marçal, iha área Delta, Comoro, Kampung Baru, Bebonuk no fatin seluk tán.
