“Ba Timor-oan sira tomak ne’ebé mai buka oportunidade para mai hadi’a sira-nia moris iha Reinu Unidu, hakuak bo’ot no domin tomak ba imi. Imi-nia família tomak hatene imi ba buka esforsu a’an iha ne’e, primeiru tanba ita-nia rain seidauk bele oferese servisu ba ema hotu no segundu aproveita oportunidade ida ne’e imi hadi’a família-nia vida iha Timor,” PM Xanana tatoli mensajen ne’e bainhira hamutuk ho Embaixadór Timor-Leste iha Reinu Unidu, João Paulo halo lansamentu ba programa Podcast “The Citizen’s Connection”, Online INDEPENDENTE sita iha Komunikadu.
Xefe Governu husu ba Timor-oan hotu- hotu hatudu a’an hanesan embaixadór foinsa’e atu presta servisu ho disiplina, badinas hodi manán espriénsia servisu no hetan konfiansa hosi povu no Estadu Reinu-Unidu.
“Imi ajuda familia iha Timor laran, imi sira hotu hela iha rai seluk, ita costume dehan katak, imi ida-idak, sai mós hanesan embaixadór ita nia rai nian ba iha komunidade ne’ebé imi servisu ba. Ne’e duni favor hatudu imi nia komportamentu ne’ebé diak, imi nia disiplina ne’ebé aas no entrega tomak ba servisu hodi hetan konfiansa husi sira ne’ebé fó hela servisu ba imi no Governu Reunu Unidu lori Governu nia naran, ha’u tenke agradese ba imi nia partisipasaun ne’ebé imi hatudu hodi haruka netik buat rum aba familia hodi hadia familia nia moris no imi kontinua servisu hatudu katak, Timoroan foti aas ita nia rain husi imi nia komportamentu,”Eis Prezidente Repúblika ne’e dehan.
Governu liu hosi Emabixada Timor-Leste iha Reinu Unidu kontinua nafatin habelar ninia programa diplomatika nian no tau matan ba Timor-oan sira hotu ninia kondisaun.
PM hatutan, foin lalais selebrasaun loron natal, tinan foun to’o misa pasku sarani rihun ba partisipa misa la’o avontade, tanba problema komesa redús hodi kontribui harii pás no garante estabilidade.
“Ita hotu tenke hamutuk ho espiritu ba dame, espiritu ba hadomi malu, hodi ita nia rain bele dezenvolve aan,”Líder Karismátiku ne’e apela.
Iha ámbitu ne’e, Primeiru-Ministru IX Governu Konstitusionál informa mós katak, Governu kontinua suspende atividade Grupu Arte Marsiál (GAM) no Grupu Arte Rituál (GAR) hodi hein atu loke programa kompetisaun desportu nivel nasionál.
Iha fatin hanesan, Prezidente Asosiasaun Timor iha sidade Peterborough-Reinu Unidu, Celso Oliveira konsidera mensajen Xefe Governu importante hodi motiva Timor-oan sira kontinua servisu disiplina no promove kultura no unidade nasionál entre Timoroan.
“Ho respeita no hadomi tomak hodi rona mensajen husi ita nia aman, maun boot Primeiru Ministru, Kay Rala Xanana Gusmão hodi hato’o mensajen ida hanesan aman ba oan sira no husu atu kontinua nuudar Timoroan servisu nafatin kontribui ba ekonomia familia no ba dezenvolvimentu ba ita Timoroan sira,” nia orgullu.
Celso Oliveira agradese ba Governu Timor-Leste ne’ebé halo esforsu makas atu kontinua sosa rai hodi harii embaixada Timor-Leste nian iha Reinu Unidu hosi fasilita servisu governu no atende Timor-oan sira.
Nia hatutan, durante ne’e Asosiasaun Timor iha sidade Peterborough-Reinu Unidus mós sempre selebra eventu desportu no selebrasaun kultura hodi promove identidade Timor-Leste nian no kontinua bolu atensaun ba ema hotu mantein paz no dame iha ida-idak nia hela hela fatin no fatin servisu sira.
Bazeia dadus tinan 2017 Timor-oan iha Reinu Unidu hamutuk 16.000, Embaixada seidauk rejista hikas Timor-oan sira, iha parte seluk Timor-oan sira barak mós seidauk ba halo rejista iha Embaixada Timor-Leste iha Londres.
Entretantu, hafoin hato’o mensajen, iha parte lokraik, Xefe Governu hamutuk ho Embaixadór Timor-Leste ba Reinu Unidu, João Paulo oferese mós jantar kalan no hanamu muzika Timór hamutuk ho Timor-oan sira hodi kontinua tatoli mensajen domin no fraternidade nian.
