Primeiru-Ministru husu ne’e iha ámbitu avaliasaun reuniaun Konsellu Administrasaun Fundu Infraestrutura (KAFI) ne’ebé partisipa hosi ministériu save sira no Prezidente Autoridade munisipál sira, iha Ministériu Finansas, Aitarak-laran, segunda (20/01/2025).

“To’o fulan-Marsu, prosesu aprovizionamentu ba projetu sira tenke konklui ona hodi bele prepara-aan ba tinan sira tuir mai. Dala ruma atu aprezenta proposta orsamentu, kada ministru haree de’it ba nia-aan rasik, la haree ba sira seluk. Ida ne’e mak ita nia problema. Husu servidór Estadu hotu, iha buat barak ne’ebé seidauk halo hotu iha tinan 2024 tanba hadi’a sistema no importante liu iha sistema ne’e mak problema ezekusaun orsamentu fundu infraestrutura,”dehan PM Xanana liu husi komunikadu ne’ebé Online INDEPENDENTE asesu, segunda ne’e (20/01/25).

Xefe Ezekutivu observa katak, projetu barak la la’o tanba fó bá malu de’it no balun hetan ona seidauk halo maibé fó nafatin, ida-ne’e afeta bá ezekusaun orsamentu.

Biban hanesan, Ministru Planeamentu no Investimentu Estratéjiku, Gastão Francisco de Sousa esplika, objetivu sorumutu ne’e atu halo avaliasaun ba ezekusaun Orsamentu Jerál Estadu hosi Fundu Infraestrutura (FI), tinan 2024 nian no saida mak presiza hadi’a iha tinan 2025.

Tinan 2024, alokasaun orsamentu iha FUndu Infraestrutura millaun $301, konsege ezekuta 75%, signifika ezekuta millaun $226 hosi totál 301 alokadu.

Primeiru-Ministru hakarak partisipa mós iha sorumutu ne’e tanba hakarak hatene projetu saida mak la’o no saida mak la la’o, tuir planu iha fulan-Marsu tinan ne’e Primeiru-Ministru sei tun direta bá munisípiu hodi haree implementasaun projetu sira.

Durante debate Orsamentu Jerál Estadu (OJE) tinan 2025 iha Parlamentu Nasionál (PN), Primeiru-Ministru deklara tinan ne’e nu’udár tinan implementasaun, no tenke implementa ho di’ak, tuir dalan loos atu infraestrutura iha kualidade ne’ebé di’ak.

Gastão Sousa haree projetu sira la’o hela, maibé pedidu pagamentu balun de’it mak tama bá Ministériu, projetu foun ezekuta balun de’it, iha projetu ne’ebé retensaun pedidu pagamentu bá Ministériu balun de’it, projetu balun tenke konklui maibé selu balun de’it, projetu ne’ebé abandonadu tau tiha osan atu selu maibé la selu.

Tanba ne’e Ministru dehan, Primeiru-Ministru bolu atensaun bá membru Governu sira atu tau-matan bá ezekusaun orsamentu Fundu Infraestrutura nian, akompaña implementasaun projetu sira tanba orsamentu alokadu bá tinan 2025 millaun $310.

Tuir dadus, projetu foun no projetu ne’ebé sei la’o hela ne’e barak, balun seidauk selu hotu tanba kontratu ne’ebé Fundu Infraestrutura halo maka pluriannuál, iha tinan 2025 projetu foun 700-resin.

Tanba ne’e maka Ministériu tenke haree didi’ak hodi implementa ho di’ak tanba povu kiik mak sei hetan benefisiu. Projetu sira ne’e mak hanesan estrada, eskola, sentru saúde, postu seguransa iha fronteira no seluk-tán.

Iha mós projetu sira ne’ebé la konsege finaliza tanba la akompaña ho di’ak, empreza hetan projetu liu ida no kestaun finanseira.