Primeiru-Ministru, Xanana Gusmão durante reuniaun ho antigu Xefe Governu Kambodia, manifesta profunda apresiasaun ba vizita ofisiál ida-ne’e, no afirma katak, ida-ne’e hanesan onra ida hodi simu Hun Sen iha páis ne’e no espera vizita ida-ne’e iha ninia signifikativu kle’an.
Primeiru-Ministru mós subliña kona-ba lasu amizade istóriku entre país rua no konsidera Hun Sen nu’udár amigu di’ak ida ba Timor-Leste durante tempu naruk.
Xanana Gusmão konsidera relasaun amizade ho Hun Sen nakonu ho respeitu tanba ninia empeñu duradoura lideransa kona-ba solidariedade rejionál.
Molok hakat mai Palásiu Governu, iha dader Hun Sen hala’o uluk enkontru bilaterál ho Prezidente Repúblika, José Ramos-Horta iha Palásiu Prezidensiál no mós partisipa iha sesaun solene iha Parlamentu Nasionál.
Iha Parlamentu Nasionál, Hun Sen manifesta konviksaun kona-ba Timor-Leste merese sai hanesan 11º membru ASEAN nian.
Hun Sen akresenta kona-ba Kambodia totalmente fó apoiu ba adezaun plena Timor-Leste nian ba ASEAN, dezde inísiu no servisu maka’as atu promove konsensu iha ASEAN kona-ba proposta Timor-Leste nian.
Timor-Leste ho Kambodia estabelese relasaun diplomátika iha tinan 2002, inaugura ona ninia reprezentasaun diplomátika iha Phnom Penh no Díli iha tinan sira tuir mai.
Iha tinan 2022, bainhira assume kn’ar nu’udar Prezidénsia ASEAN nian, Kambodia hatuur-an ho papél importante iha aprovasaun akordu ba prinsípiu sira kona-ba adezaun plena Timor-Leste nian ba Organizasaun rejionál ne’e.
Tuir ajenda, aban 9 Maiu 2025, Prezidente Hun Sen sei simu kondekorasaun Grande Kolar Órdem Timor-Leste nian, hanesan kondekorasaun as-liu husi Estadu TL, ba rekoñesimentu kontribuisaun iha fortalesimentu relasaun bilaterál liu-liu ba apoiu kontinua durante prosessu adezaun Timor-Leste nian ba ASEAN.
