Primeiru-Ministru konsidera, hanesan onra boot ida atu partisipa iha sesaun konjunta líder mundiál sira nian iha fórum altu nível kona-bá parseria multissetoriais ne’e.
“Espressa ha’u-nia sinsera gratidaun bá Governu Indonézia bá ninia kaloroza ospitalidade no bá organizasaun fórum importante ida-ne’e. Ha’u felisita mós Indonézia bá ninia papél fundamentál iha apoiu Kooperasaun sira Súl-Súl,” dehan PM liu husi Komunikandu ne'ebé Online INDEPEDENTE asesu (02/08).
Xefe Governu TL ne’e relembra katak, iha tinan 1955, Indonézia inisia bá dala-uluk hodi halibur nasaun dezenvolvidu sira liu-hosi Konferênsia Bandung, halibur país sira Súl Globál, iha prosekusaun interesse komún no mantein firme iha defeza soberania.
Hosi ne’e maka, Súl konsege assegura katak prinsípiu konsagradu sira iha espíritu Bandung integra duni iha tratadu sira internasionál nian no mós iha kuadru sira kooperasaun multilaterál.
Iha ne’e mós Xanana konta katak, loron tolu liu bá, Timor-Leste selebra ninia aniversáriu 25º Konsulta Populár, loron ne’ebé povu TL ezerse ninia direitu bá autodeterminasaun.
“Ami sente onrdadu tebes iha eventu importante ne’e tanba ho prezensa Sekretáriu-Jerál Organizasaun Nasaun Unidas (ONU), António Guterres, no mós ami-nia amigu internasionál sira. Ami sente orgullu ho estabelesimentu Estadu ida demokrátiku no dinámiku ho nia sosiedade ida livre no aberta,” Xanana heteten tán.
Lisaun importante ida ne’ebé TL apreende hosi istória rasik maka forsa podér boot hosi kooperasaun entre Estadu frázil sira.
TL kompriende katak, dezenvolvimentu labele alkansa bainhira la iha pás.
Ho razaun ida-ne’e maka Timor-Leste inisia ho kriasaun g7+, grupu ida hosi país frázil 20 ho komitmentu mútua atu fó apoiu bá malu hodi alkansa reziliênsia no pás.
Ohin loron, mundu enfrenta dezordem, inklui dezafiu boot hanesan pobreza globál, dezigualdade, konflitu sira no mós alterasaun klimátika sira.
Buat ne’ebé importante maka rekoñese katak labele rezolve problema sira ne’e no tenke esplora modelu foun sira hosi parseria no kooperasaun atu apoia país sira ne’ebé menus dezenvolvimentu no mós Estadu illa kiik dezenvolvidu sira.
Tenke garante katak, parseria sira multissetoriais nian respeita idaidak ninia soberania, solidariedade no mo Espíritu Bandung nian.
Xanana Gusmão hato'o agradese bá Indonézia ne’ebé organiza sesaun ida-ne’e. Hamutuk, bele remodela ajenda dezenvolvimentu globál, dezbloqueia poténsia hotu-hotu iha Súl Globál no konstrui sistema internasionál ida ne’ebé verdadeiramente ho intensaun mútua atu bele fó atendimentu bá nesessidade sira nasaun hotu-hotu nian.
Prezidente Joko Widodo (Jokowi) iha abertura konferénsia ne’e hatuur aspetu importante haat ho esforsu atu realiza dezenvolvimentu ne’ebé ekitativu no inkluzivu liu, liu-liu bá nasaun dezenvolvidu sira.
“Ita presiza vizaun foun, estratejia foun no tátika foun hodi alkansa dezenvolvimentu ne'ebé ekitativu no inkluzivu. Tanba ne'e, ha'u hakarak subliña pontu prinsipál ha’at,” Jokowi hateten.
Joko Widodo hatete, Pontu dahuluk maka alvu atu atinji objetivu dezenvolvimentu sustentável (ODS) tenke sai foku prinsipál iha dezenvolvimentu globál. Daruak maka, kompromisu Indonézia nian hodi hola parte iha solusaun globál no luta bá interese nasaun sira Súl nian. Iha ne’e Indonézia sei sai hanesan ponte ida hodi promove igualdade, justisa no solidariedade hodi aselera implementasaun ODS sira.
Da-toluk, Indonézia nia prontidaun atu estabelese parseria ho parte oioin, liuliu ho rejiaun Áfrika nu’udár xave iha ajenda dezenvolvimentu globál. Da-haat, Xefe Estadu Indonézia ne’e husu bá nesesidade atu hamoris fali solidariedade globál hodi hametin kooperasaun nasaun sira súl-súl no hasa’e kooperasaun Norte-Súl.
