“Aproveita ida ne'e mós nu'udar Eis-jornalista ida, imi hotu hatene katak, ha'u nia naran Xanana ne'e, Xanana jornalista nian, funu nian ne'e Kay Rala. Ne'ebé nu'udar Eis-jornalista ida ha'u ezije ba imi, hadi’a, hadi’a, hadi’a, la'ós atu taka imi nia ibun, bainhira governu halo sala, labele taka. Mais saida mak loos tau, saida mak sala tau, mais haree tuir kedas ona baze problema ida ne'e mak ha'u husu,” afirma Xefe Governu, ba jornalista sira, bainhira hato'o mensajen ba aniversáriu GMN-TV ba dala-9,  iha Palásiu Prezidensiál Bairu-Pite, Sexta  (05/06).

Nune'e, PM Xanana hato'o parabéns ba jornalista sira-nia servisu ne'ebé haklaken ba povu tomak, buat ne'ebé akontese iha rai laran, iha área  oi-oin, husi área polítika, área ekonómika.

Mais saida mak ha'u husu ba imi, presiza nafatin hadia imi nia kapasidade nu'udar jornalista,” Nia haktuir. Ne'e la'ós krítika imi, hatun imi, la'e, buat ne'e presiza hadi’a, imi hotu. Nune'e, bainhira mosu buat ruma, imi ánaliza tiha mak foin husu. La'e, husu ne'e hanesan fali média iha sosiál, ne'e labele,” Tenik Xanana.

Nia informa, tanba jornalista ida-idak tenke iha diresaun ne'e, tenke diskute malu, hadi’a nafatin tanba média la'ós atu dehan tenke di'ak de'it ba governu ne’e la'e.

Maibé, bainhira atu krítika, bainhira tau problema ruma, tenke hatene didi'ak kauza, tenke hatene didi'ak buat sira-ne'e hotu mak tau, ida ne'e mak funsaun média ninian.

Tanba, funsaun média atu fó informasaun ne'ebé loos, haree didi'ak, ánaliza didi'ak  atu povu bele fiar.

"Bainhira imi fó informasaun ne'e ba povu, povu dehan loos duni, povu sei fiar. Bainhira haree imi esplika Timor ne'e la'o nusa, la'o ba ne'ebé ona, povu dehan loos duni, tanba fiar,” Nia relata.