DILI: Primeiru Ministru, Kay Rala Xanana Gusmão afirma, to’o ohin loron governu seidauk hatene klaru estatutu aviaun Zona Espesial Ekonomia Sosial Merkadu, no prosesu investigasaun ba asuntu ne’e sei lao hela.
PM Xanana hatete, liu husi prosesu investigasaun ne’e mak atu buka hatene estatutu husi aviaun ZEESM ne’ebé tula de’it ema uitoan maibé gasta osan barak tebes.
"Husu ba povu Oekusse kalma. Aviaun ne'e see nian mós ita la hatene, ne'ebé iha hela prosesu investigasaun," dehan PM Xanana ba jornalista sira hafoin enkontru semanál ho PR Horta iha Palásiu Prezidensiál Bairu-Pite, Kinta (19/02).
Sei publika relatoriu jogu online
Iha tempu hanesan, PM Xanana mós koalia kona-ba polemika jogu online iha Oekusse.
Tuir nia, jogu online ne'e kleur tiha ona, la'ós foin agora.
"Jogu online ne'e kleur tiha ona, laos agora. Ikus ne'e mak mosu tan, mosu tan ne'e, mais uluk liu tiha ona," dehan PM Xanana.
Tan ne’e, Xanana dehan, nia nunka autoriza loke kasino, tanba sei halo ema barak mak lakohi servisu.
“Timor-oan hakarak nune'e, nia joga tau $1 nia manan $500, ne'e la servisu ona, nia joga de'it, joga de'it, mais lakon dehan halai tuir osan, balun iha empezáriu lokál ida di'ak tebtebes, nia kompaña ida di'ak tebtebes, kapás tebtebes mais nia jogu online nia faan nia ekipamentu, nia faan buat hotu-hotu," dehan Xanana.
