“Ita halo esforsu hela… fiar katak iha tempu badak sei halo,” dehan PM Taur hafoin enkontru semanal ho Prezidente Repúblika Francisco Guterres Lu Olo iha Palasiu Prezidensial, Kinta (07/06).
Iha oportunidade ne’e, PM Taur mós husu ba komunidade sira atu aguenta hodi haan buat ne’ebé iha, tanba daudauk ne’e governu sei sosa foos husi rai li’ur.
“Foos ita iha uitoan de’it hanesan ita hotu hatene, governu tau osan ba sosa, enkuantu foos seidauk mai haan lai buat ne’ebé iha,” dehan nia.
Molok ne’e, Ministra Solidariedade Sosial no Inkluzaun Armada Berta dos Santos hatete, to’o oras ne’e MSSI seidauk bele halo pagamentu ba subsidiu $100 tanba sei hein dadus husi MAE.
Tuir planu, prosesu ba dadus ne’e sei remata iha loron 8 fulan ida ne’e.
Ministru Administrasaun Estatal Jose Abilio Caetano dehan, prosesu rekolla fixa familia atinze ona porsentu 70, tan ne’e garante katak sei termina iha loron 4 nia laran.
Entretantu, tuir negosiante ida iha merkadu Bairu-Pite, subsidiu $100 ba kada uma-kain la sufisiente.
“Ha’u sente osan ho montante $100 la to’o ba familia sira tanba iha uma laran oan barak hodi fó han sira,” dehan nia.
