“Há’u sente sokadu, triste no lamentável tebes, wainhira rona notísia tristeza kona-ba Amo Bispu Baukau Dom Basílio do Nascimento nia mate ne’ebé derrepente de’it, ha’u la espera katak ita-nia Amo Bispu bele hasoru situasaun hanesan ne’e, maibé ne’e Maromak nia planu ita hotu la hatene,” PM Taur hato’o sentimentu tristeza ne’e liuhosi nota imprensa ne’ebé Online Independente, asesu sábadu ne’e.
Tanba ne’e, Xefe Ezekutivu hato’o profunda sentida konsolénsia kle’an ba família ne’ebé Bispu husik hela.
“Hodi há’u nia naran rasik, há’u-nia espoza no Governu Timor-Leste nia naran, hakarak hato’o profunda sentida kondolénsia ne’ebé kle’an ba família hosi Amu Bispo nian ein-partikulár, sarani Dioseze Baucau no Uma Kreda Timor-Leste ba lakon bibi atan di’ak ne’ebé serbí ona Dioseze Baucau besik tinan 25. Mai ita hotu hasa’e orasaun ba Aman Maromak atu simu ita-nia saudozu iha Nai nia Kadunan Santu no husu atu kontinua tau matan mai ita,” nia afirma.
Enkuantu Bispo ne' e hetan atakasaun moras fuan ona iha Munisipiu Kovalima iha loron 29 Outubru 2021, bainhira nia remata hala'o atividade rejiliozu balun iha ne'eba nune'emediku sira evakua kedas ba iha Ospital Suai.
Iha loron ne'e kedas mediku na’in rua husi Dili ba Kovalima no iha loron 30 Outubru 2021 evakua kedas Amo Bispo ho aviaun ZEESM mai Dili
Bispu Diozese Baucau ne’ebe moris iha Suai, 14 Junu 1950, hakotu iis iha Hospital Nacional Guido Valadares (HNGV) ohin (30/10) iha tuku 11: 45 hafoin evakua hosi munisípiu Kovalima ho aviaun ZEESM mai Dili.
