Xefe Governu ne’e dehan, programa ne’e realiza, tanba iha konstituisaun Repúblika Demokratika Timor-Leste hateten katak, sidadaun hotu tenke iha uma dignu.
Tan ne’e, Governu tenki fó apoiu, ba ema kbiit la’ek sira atu hetan uma dignu.
Tanba, realmente hatudu katak, populasaun barak mak sei hela iha fatin ne’ebé kondisaun la merese ba sira, kondisaun ne’ebé la dignu.
Nune’e, Governu hamosu programa UKL no mós UKL+, ne’ebé implementa husi Ministeriu Administrasaun Estatal no PNDS.
“Ha'u senti kontenti tebes, tanba premeira vez ha'u partisipa iha programa UKL Plus e ha'u kontenti liu tan, tanba MAE no Ekipa tomak bele intende politika VIII Governu Konstituisional nian hodi aplika ho diak. Programa ida ne’e, halo ema barak apresia tebes,”refere komunikadu ne’ebé Online INDEPENDENTE asesu, iha Pajina Ofisial PM, kuarta ne’e (28/09).
PM haktuir, iha tinan 2021, Governu konstrui ona UKL ba benifisiariu sira hamutuk 1.254, ho nia orsamentu hamutuk dolar amerikanu tokon U$25.
Ho nune’e, nia dehan, iha orsamentu Jeral Estadu tinan fiskal 2022 nian, Parlamentu Nasional (PN) deside hodi aumenta tan dolar amerikanu tokon U$71, ba programa UKL+, hodi konstrui uma ba benifisiariu hamutuk 4.000.
“Iha populasaun balun mak ita apoiu material konstrusaun iha programa UKL Plus A no UKL Plus B, ita disritibui Zinco ka Kalen e depois populasaun troka rasik sira nian kalen ne’ebé feruzen ona,” tenik PM.
Nia hatutan, husi orsamentu ne’ebé alokadu, gasta ona ba kompra kalen hamutuk milaun 1 ba benifisiariu 2000, ho orsamentu hamutuk rihun $775.
Tanba ne'e, Xefe Governu agradese ba Ministru Administrasaun Estatal ho Ekipa no PNDS, Prezidenti Autoridade Munisipiu, Administrador Munisipiu, Administrador Postu Administrativu sira, Xefe Suku, Xefe Aldeia, Lia nain sira, no mós benefisiariu sira no populasaun tomak ne’ebé ho esforsu tomak kontribui ba programa Uma Kbiit La’ek ne’e.
Iha fatin hanesan, Ministru Administrasaun Estatal, Miguel Pereira de Carvalho, hatete, Parlamentu Nasional aprova orsamentu adisional retifikativu ho montante dolar amerikanu tokon U$10 iha tinan 2022, hodi implementa programa Uma Kbiit Laek (UKL) Plus ho kategoria B.
Entretantu, MAE kumpri mandatu konstituisional RDTL iha artigu ida, hatete katak populasaun no sidadaun sira hotu iha direitu, atu iha uma ne'ebé kondisaun adekuadu, atu nune’e anin no udan labele kona sira.
Enkuantu, Governu hare'e katak uma ida ne'e la to'o, tan ne'e orsamentu ratifikativu tinan 2022 ne'ebé aprova iha fulan maiu tinan ida ne'e, uma hamutuk rihun 1 aumenta UKL kategoria A no mós fahe kalen hanesan ba populasaun hamutuk 6.000 iha Timor laran tomak.
