"Ohin, enkontru ne'e foka ba diretu labarik nian, hodi haree oinsá mak hasoru debate ou plenaria ne'ebé mak sei liga ba projetu lei protesaun labarik no Juventudi iha perigu, tanba bazea ba karta ne'ebé ami hetan husi Komisaun F katak, sei debate iha loron 04 fulan-Outubru," dehan nia ba jornalista sira, iha salaun MSSI, tersa ne’e (27/09).
Nia hatutan, iha enkontru ne’e mós, koalia kona ba preparasaun oinsa atu atende iha debate ne'e, hodi asegura situasaun real labarik sira nian iha Timor-Leste.
Molok ne'e, Sekretária Komisaun F, iha Parlamentu Nasional, Deputada Helena Martins Belo, hatete Parlamentu Nasionál (PN) liu Komisaun F, seidauk finaliza aprovasaun paresér finál ba diskusaun espesialidade projeitu-lei númeru 29/V(3a) protesaun ba labarik no foinsa’e iha perígu, hodi submete ba meza Parlamentu Nasioná atu halo aprovasaun iha finál globál.
"Ami tinan ida-ne'e ami tenke finaliza no semana ida ka rua ami aprova ona paresér finál no submete ba meza Parlamentu," dehan nia, iha Parlamentu Nasionál (PN) foin lalais.
Nia haktuir, projetu lei bainhira Parlamentu Nasionál aprova no Prezidente Repúblika promulga sei proteze labarik sira.
Projetu lei ne'e, nia relata, inisiativa ne'e mai husi Parlamentu Nasionál ho hanoin ida katak oinsá joven sira labele kontinua servisu todan.
Projeitu lei ne'e Komisaun seidauk konklui tanba presiza halo diskusaun kle'an ho parte relevante sira.
"Kleur tanba primeiru ita halo ba labarik sira iha Timor-Leste, ita labele hanoin katak ita ho país sira atu hanesan, entaun ita halo lei tenke haree didi'ak, labele dehan lalais de'it, depois implementasaun ladún di'ak, entaun fó sala fali ba Parlamentu," Nia haktuir.
Nia fundamenta, tanba ne'e mak Projetu lei la'ós baibain atu halo lalais, maibé lei ida-ne'ebé asegura no kontempla duni ba realidade duni ba situasaun ne'ebé labarik sira iha Timor-Leste.
Enkuantu, iha loron 20 setembru 2021, Parlamentu Nasionál, aprova projetu-lei protesaun ba labarik no foinsa’e iha perigu iha faze jeneralidade. Projetu-lei númeru 29/V(3a) ho rezultadu votasaun a-favór 54.
Preámbulu husi projetu-lei ne'e previstu kona-ba dezenvolvimentu ida ba sistema protesaun integrál ba labarik sira, nune'e impoin esforsu armonizasaun lei hotu-hotu relasaun ho promosaun no protesaun diretu ba labarik no joven iha perigu sira.
Projetu-lei ne'e iha artigu hamutuk 103 no kapitulu hamutuk XI. kapitulu I ko'alia kona-ba dispozisaun jerál, kapítulu II ko'alia kona-ba intervensaun ba promosaun direitu sira no protesaun labarik no joven iha perigu.
Aleinde, iha Kapítulu III, ko'alia kona-ba medida promosaun direitu no protesaun, kapitulu IV ko’alia kona-ba komunikasaun, kapitulu V ko'alia kona-ba intervensaun Ministériu Públiku, kapitulu VI previstu dispozisaun prosesuál jerál, kapitulu VII sita kona-ba prosedimentu urjénsia, kapítulu VIII ko'alia kona-ba prosesu iha servisu protesaun labarik no foinsa’e no kapítulu IX ko'alia kona-ba prosesu judisiál promosaun no protesaun.
