Ho nune'e, Xefi Governu ne'e husu deskulpa ba publiku kona ba perturbasaun refere.
“Hau senti tristi, lamenta no arepende haree violensia foin liu ba iha Kapital Dili. Nuudar Primeiru-Ministru hau husu deskulpa, tanba perturba inan-aman, komunidade no sidadaun sira nia hakmatek. Mai ita deklara violensia hanesan inimigu ita-nian, no promete kombate hasoru violensia to’o halakon iha ita rain doben Timor-Leste,” dehan nia liu husi komunikadu ne’ebé Online INDEPENDENTE, asesu tersa ne’e (06/09).
Enkuantu, Primeiru Ministru husu Polisia Nasional Timor Leste (PNTL) atu halo vijilansia masimu, nune’e mantein orden publiku.
Entretantu, hanesan Primeiru Ministru no mós Ministru Interior alerta ona ba Komando PNTL, atu vijilansia masimu hodi mantein orden publiku liu-liu iha Kapital Dili, no apela mós ba joven sira atu hakmatek hodi kontribui ba estabilidade nasional, husik problema krimi ne’ebé akontese ona entrega ba justisa.
