Enkuantu, haree ba Munisípiu Ermera ne’ebé persentajen simu vasina foin atinji pursentu 12 (12%), ki’ik liu kompara ho Munisípiu sira seluk iha teritóriu laran.
Desde kampaña nasionál imunizasaun nian hahú iha fulan-Abril, no daudaun ne’e Munisípiu Ermera mak kazu pozitivu Covid-19 as liu iha fulan ikus ne’e.
Tanba ne’e, Konsellu Ministru deside iha fulan kotuk aplika fali Serka Sanitária no konfinamentu domisiliáriu obrigatóriu ba iha Postu Ermera no Railaku hodi bandu populasaun sira iha Postu rua ne’e halo movimentasaun atu evita propagasaun ba área seluk, maske nune’e, Governu fó exesaun ba komunidade ne’ebé simu ona vasina dala rua livre halo sirkulasaun.
Nune’e, Xefe Governu enkoraja ba populasaun sira iha Munisípiu Ermera atu pro ativa ba simu vasina kontra Covid-19 hodi hasa’e imunidade kontra virus refere no liuliu ba Variante Delta ne’ebé daudaun ne’e da’et maka’as País hotu iha mundu inklui Pais viziñu Indonézia (NTT), liuliu kona ema ne’ebé seidauk vasina grave kedas.
“Governu husu no ha’u pesoalmente husu inan-aman sira tenke partisipa iha kampaña vasinasaun, tanba Ermera munisípiu ida hetan vasina ki’ik liu, 12% de’it. Porezemplu hanesan Vikeke segundu lugar tuir Díli, entaun ha’u enkoraja sira dalan di’ak liu ita atu kombate moras ne’e mak simu vasina í ita sei iha vasina sufisiente para fó ba ita-nia sidadaun sira tanba ne’e ha’u enkoraja sira para simu vasina. Se ita-boot sira hare medidas ne’ebé Governu hasai ema ne’ebé simu ona vasina dala rua nia livre, i hanesan ne’e mós pior liután ho Variante Delta ne’e ita preokupa loos, ne’e iha tiha ona viziñu Indonézia, iha ona entaun ita preokupa loos, tanba ne’e mak ha’u kontinua enkoraja sira simu vasina ne’e importante”, dehan Xefe Governu, iha Palasiu Prezidensia Aitarak-Laran, kinta ohin (05/08).
Kona-ba medidas serka sanitária no konfinamentu domisiliáriu iha Postu Rua Munisípiu Ermera nian, Xefe Governu esplika, Governu toma hela atensaun ba situasaun ne’e oinsá buka posibilidade, tanba Ermera hanesan Munisípiu produtór kafé.
Tanba ne’e, Xefe Governu sujere dalan di’ak liu mak populasaun sira tenke simu vasina atu iha flexibilidade ba regra.
Enkuantu, tuir dadus Munisípiu Ermera to’o ohin loron 5 fulan-Agostu tinan 2021, rezista ona kazu komulativu konfirmadu pozitivu Covid-19 hamutuk 763, númeru rua hafoin Munisípiu Dili, no daudaun ne’e kazu ativu ne’ebé iha Sala Izolamentu hamutuk 616.
Asistente Editor: Saturnina da Costa
