"Ami sei lori planu asaun nasional violensia bazeia ba jéneru ne'e ba iha Konsellu Ministru atu hetan aprovasaun," dehan Sekretariu Estadu Igualidade no Inkluzaun (SEII), Maria do Rosario Fatima, iha rezidensia primeiru ministru, Faról, horisehik.

Nia hatutan, SEII iha primeiru ministru nia okos, tanba ne'e mai relata atividade hirak ne'ebé halo ona, entaun suru-mutu ne'e haree liu ba revizaun datoluk ba planu asaun nasional violensia bazeia ba jéneru.

Enkuantu, husi Lei Kontra Violensia Domestika ne'ebé vigora no implementa iha 2010 hamosu estratejia planu anasaun nasional violensia bazeia ba jéneru.

"Planu asaun nasional violensia bazeia ba jéneru ita halo ona revizaun ba datoluk, ohin ba dala tolu ninian ita iha área tematika importante iha pilár tolu ne'ebé SEII halo," dehan nia.

Nia hatutan, pilar ida mak prevensaun, daruak mak serbisu sosiál no mós datoluk mak asesu ba justisa. Iha mós monitorizasaun no avaliasaun ne'ebé sei alina ba pilár tolu ne'e.

Iha lei hatete, iha liña ministeriál sira mós oinsá atu bele mós tau sira-nia orsamentu ba iha asuntu igualidade no jéneru ba kada tinan iha liña ministeriál ho órgaun autonomu sira no munisípal tau mós orsamentu ba sira-nia programa no orsamentu anuál ba sira.