PM husu Telemor hadia rede Internet Featured

By Mariano Mendonça Abril 11, 2024 248
Operadór telekomunikasaun Telemor. Foto: Google. Operadór telekomunikasaun Telemor. Foto: Google.

DILI: Rede internet ne’ebé durante ne’e sai preokupasaun públiku hetan mós atensaun husi Primeiru Ministru, Kay Rala Xanana Gusmão. Xefe Governu ne’e husu ba operadór telekomunikasaun Telemor atu hadia rede internet.

PM Xanana hato’o kestaun ne’e bainhira hasoru-malu ho Chief Executive Officer (CEO) Viettel Timor, Tran Van, ne’ebé atualiza programa no serbisu Telemor nian ba Xefe Governu.

“Ami kontente tebes bele mai hasoru Primeiru Ministru hodi hato’o relatóriu servisu Telemor nian nune’e mós ho ami-nia servisu dijitalizasaun no teknolojia. Ami mós ko’alia kona-bá planu Telemor nian ba tinan oin.”

“Primeiru Ministru rasik hatete katak Telemor tenke hadi’a nia koneksaun di’ak liu tan hodi lori nia koneksaun no fasilidade dijitál ba to’o komunidade iha baze iha teritoriu Timor-Leste,” dehan Tran hafoin enkontru ho PM Xanana, iha Palasiu Governu, Segunda (08/04).

CEO Viettel Timor ne’e dehan, daudaun ne’e 96% populasaun Timor-Leste mak assesu ona koneksaun Telemor nian no Telemor foku hela hodi halo instalasaun tower iha territóriu tomak no halo koneksaun internasionál.

Tran rekoñese kona-ba preokupasaun balun husi públiku ba rede internet.

“Loos duni katak ami hetan preokupasaun balun husi públiku kona-bá koneksaun internet, maibé ida ne’e tanba ami hola fila-fali husi Indonézia nune’e bainhira sira nia internet monu automatimente iha ne’e mós afetadu,” nia klarifika.

Maibé, nia hein katak ho projetu Governu nian kona-ba kabu sub-marinu Fibra Óptika ne’ebé sei mai bele hadi’a liu tan liña koneksaun iha Timor-Leste.

Entretantu, durante ne’e públiku sempre kesiona kona-ba rede internet ne’ebé konsidera lentu tebes.

Iha media sosial, preokupasaun ba rede internet ne’e sempre sai topiku ne’ebé hetan diskusaun maka’as.

Rate this item
(0 votes)

Independente Digital TV