Tuir komunikadu ne’ebé Online INDEPENDENTE asesu, iha loron 29 fulan-Novembru Primeiru-Ministru, Kay Rala Xanana Gusmão, hala’o vizita úrjente ba Ministériu Edukasaun hodi buka solusaun ba problema professores kontratadu hamutuk 1.499 ne’ebé VIII Governu kontrata iha dia 13 Abril 2023, ne’ebé sei termina sira nia kontratu iha loron 31 Dezembru 2023.

Vizita ba Ministériu Edukasaun ne’e, akontese hafoin professores 16 ne’ebé lidera husi Konselleru, Agustinho Soares, Eis Diretór Nasional do Dezenvolvimentu do Parque Eskolar, iha Ministériu Edukasaun, hasoru Xefe Governu iha Palásiu Governu, hodi husu ajuda atu rezolve problema ne’ebé sira hasoru.

Hafoin rona preokupasaun hirak ne’e, Xefe Governu koordena ho professor sira hala’o vizita ba Ministériu Edukasaun hodi hato’o sira nia problema direta ba Ministra Edukasaun no Sekretáriu Estadu, infelizmente Ministra Edukasaun laiha fatin tanba hala’o hela viazen husi Munisípiu Postu Administrativu Maliana, Munisipiu Dili mai Dili, nune’e Sekretáriu Estadu Ensinu Sekundáriu Jerál no Tékniku Vokasionál, Domingos Lepos Lemos hamutuk ho  dirijentes no  asessores mak atende enkontru ne’e.

Iha enkontru ne’e, Xefe Governu husu professores sira hato’o sira nia kestaun ba Sekretáriu Estadu no dirijentes, hafoin Konselleru Agustinho reprezenta professores hodi fó sai sira nia kestaun rua mak hanesan:

1). Husu atu mantein kontratu ba professores kontratadu 1,499, tanba Ministériu Edukasaun atu hapara sira nia kontratu iha Dezembru 2023.

2). Sira husu dekretu lei 31 maiu 2023, ko’alia kona-ba ingresu spesiál, ne’ebé hetan ona promulgasaun husi Presidente  Repúblika maibé to’o agora seidauk realiza no la inklui professores kontratadus 1,499.

Hare ba kestaun rua ne’e ne’e, Xefe Governu hateten katak, avaliasaun sempre halo, avaliasaun ne’e hala’o hodi avalia métodu ensinu professores nian hanesan oinsa mak professor sira hanorin estudantes.

Xefe Governu Xanana mós fó korazen ba professor sira atu pasiensia no kontinua hanorin, tanba eskola harii barak-barak presiza profesores atu bele prenxe iha eskola.

PM akresenta katak, Profesore nia misaun atu serbi la’ós fatin buka servisu.

“Imi nia servisu ne’e atu tau imi nia matenek no professionál hodi fahe tutan ba ita nia oan sira,  tanba estudante mak futuru ba nasaun,” informa PM, iha komunikadu ne’ebé Online ne’e sita.

PM Xanana tatoli mós ba Ministra Edukasaun, atu labele foku liu ba merenda eskolar, maibé fó prioridade ba kuantidade no kualidade profesores, no kompetensia ba Ministeriu Edukasaun hodi rezolve problema professores 1.499 to’o fulan Janeiro 2024.