Orsamentu Retifikativu 2023 ne’e, Parlamentu Nasionál aprova ho votu afavór 41, kontra 0, no abstensaun 23.
Proposta Lei ne’e inklui alterasaun dahuluk ba Lei n. 15/2022, loron 21 fulan-dezembru, kona-ba Orsamentu Jerál Estadu ba tinan 2023 no ba Lei n. 2/2022, loron 10 fulan-fevereiru, kona-ba Enkuadramentu Orsamentu Jerál Estadu no jestaun finanseira públika, no alterasaun daruak ba Lei n. 8/2008, loron 30 fulan-juñu, kona-ba Lei Tributária.
Orsamentu ne’ebé aprova ona iha despeza ho valór dolar amerikanu $439.060.944 ba asuntus ekonómikus, dolar amerikanu $24.965.254 ba abitasaun no infraestruturas koletivas, dolar amerikanu $ 94.411.189 ba saúde, dólar amerikanu $136.974.446 ba edukasaun no dólar amerikanu $ 253.389.284.
PM Xanana Gusmão liu husi intervensaun iha sesaun aprezentasaun Orsamentu Retifikativu konsidera abienta deskusaun orsamentu durante loron tolu ne’e la’o di’ak tebes mezmu mosu dezentendimentu no ideia pro kontra, maibé deputadu hotu hanoin di’ak hakarak hadia no povu no nasaun nia problema.
Xefe Governu husu ba deputadu bankada parlamentar sira atu hamutuk ho sosiedade sivil kontinua halo fiskalizasaun makas ba programa no orsamentu ne’ebé goveru sei ezekuta durante loron 120.
“Ha’u agradese tebes, hodi IX Governu nia naran, ha’u halo apelu boot tebes ida. Fiskaliza ami, imi nia dever. La’ós deit opozisaun, imi hotu tenki fiskaliza, para buat ne’e bele hala’o ho diak. Halo sala kritika, hahú husi ita boot sira ne’e, ida ne’e duni mak ita bele haforsa no haboot ita nia demokrasia atu hadia ita nia rain,”dehan PM Xanana iha komunikadu ne’ebé Online INDEPENDENTE sita.
Iha fatin hanesan, Primeira vise Prezidente Parlamentu Nasionál, Maria Terezeinha Viégas hato’o agradese ba PM Xanana ho membru governu hotu hodi partisipa ona iha deskusaun to’o remata.
“Obrigado señor Primeiru Ministru, ami tenke fiskaliza duni, knar ida ne’e mak Parlamentu nia knar no moos, fó parabens, votus de bom traballo no susesu ba Nonu Governu no mós ba ita Deputadu na’in 65 ne’ebé fó atensaun seriu ba debate orsamentu ne’e ho karakter urjente,” nia agradese.
Entretantu, tuir planu, Parlamentu Nasionál liu husi Komiaun C Trasa Asuntu Finansas no Públikas sei halo redusaun final durante semana ida, molok entrega ba Prezidente Repúblika atu promulga.
