Orsamentu Retifikativu ne’e Governu aprezenta hodi bele responde ba nesesidade povu nian ne’ebé presiza atu hetan atendimentu urjente.

Ne’e duni, Alkatiri deklara katak, nu’udar Xefe Governu sei ba aprezenta Orsamentu Retifikativu ba deputadu sira.

“Sim, ha'u rasik mak ba aprezenta Orsamentu Retifikativu iha Parlamentu Nasionál”, dehan nia, iha Timor Plaza, horisehik.

Orsamentu Retifikativu ne’e rasik aas liu Orsamentu Jerál do Estadu 2017, tanba iha OGE totál orsamentu ne’e rasik ho montante biliaun $1.3, maibé iha Orsamentu Retifikativu ne’e aumenta tokon $200-resin hodi soma hamutuk biliaun $1.6.

Iha fatin ketak, Presidente Parlamentu Nasionál, Aniceto Guterres hatete, meza Parlamentu Nasionál halo despaxu admisaun ba Komisaun C PN atu halo pareser tékniku hodi halo ajendamentu ba diskusaun iha plenária.

Tuir nia, meza sei foti desizaun halo konferénsia estraordináriu ho lider bankada sira atu bele deside kona-ba diskusaun Orsamentu Retifikativu ho karakter urjénsia ka halo diskusaun normál hanesan baibain.

Tanba ne’e, meza sei hein hela pareser tékniku husi komisaun C PN hafoin halo konferénsia lider bankada sira atu deside kona-ba karakter diskusaun ne’e.

Kuandu lider bankada sira deside ona karakter diskusaun, meza Parlamentu Nasionál sei foti medida ida hodi konvoka plenária estraordinária atu bele halo diskusaun OR, másimu posivel iha semana ne’e nia laran.