Investigasaun ne’ebé GSKKKO hala’o ne’e bazeia ba rekerimentu husi Bankada FRETILIN ba Ministériu Públiku (MP) atu loke investigasaun ba relatoriu KIP.
“Ha’u simu tiha ona (rekerimentu) dirije mai Gabinete Prokuradór Jerál. Portantu ha’u simu tiha ona,” deklara Prokuradór Jeral Repúblika José da Costa Ximenes hafoin enkontru ho Prezidente Repúblika Francisco Guterres Lu Olo iha palasiu prezidensial Bairro-pite, Tersa (03/09).
PJR dehan, nia parte hatuun ona rekerimentu refere ba GSKKKO atu hahú hala’o prosesu investigasaun.
“Ami haruka ba Gabinete Sentral Kombate Korupsaun no Kriminalidade Organizada atu haree no komesa daudauk, haree investigasaun la’o nusa nune’e mós prosesu sira seluk,” dehan José.
Iha fatin ketak, Vise Prezidente Bankada FRETILIN Francisco Miranda Branco deklara, nia parte hatama rekerimentu ba MP atu investiga relatoriu KIP tanba Parlamentu Nasionál laiha ona vontade ba relatoriu refere.
“Entaun, ami iha kapasidade hanesan reprezentante povu iha uma fukun ida ne’e tuir saida mak iha relatoriu haruka rekerimentu ba MP,” dehan Branco.
Kona-ba konfidensialidade husi relatoriu ne’e tanba seidauk hetan apresiasaun iha plenaria PN, Branco hatan, relatoriu KIP final ona nune’e Bankada FRETILIN iha direitu atu uza relatoriu ne’e.
“Relatoriu KIP finál tiha ona, tanba ne’e ami iha direitu uza relatóriu ida ne’e. Ami la uza lori públika, tanba bainhira publika entaun ami viola ona sijiliu justisa, ami respeitu ba sijiliu ne’e mak ami haruka nota ida hodi akompaña no entrega iha MP ho karakter sijiliu,” nia esplika.
Iha fatin hanesan, Prezidente Komisaun E trata asuntu Infra-estrutura, Abel Pires da Silva hatete, Bankada FRETILIN iha direitu maibé dokumestus relatoriu KIP rasik seidauk ofisial.
“Legalmente no formalmente relatoriu KIP ne’e seidauk aprova, interligasaun instituisaun nian loloos relatoriu ne’e produtu legal ida, hanoin politika la loos sai loos fali no ida loos ne’e sai sala fali, ida ne’e akontese beibeik. Hanesan membru PN lamenta, ha’u lamenta tanba relatoriu ne’e rasik seidauk aprova,” dehan nia.
Molok ne’e, Prezidente Parlamentu Nasionál Arão Noe deklara katak relatoriu KIP konfidensial tanba seidauk hetan apresiasaun iha plenaria Parlamentu Nasionál.
Prezidente PN hato’o kestaun ne’e relasiona ho deklarasaun husi Bankada FRETILIN atu haruka rekerimentu ba Ministériu Públiku (MP) hodi halo investigasaun ba relatoriu (KIP) ba projetu 143.
“Ha’u rona informalmente de’it kona-ba FRETILIN haruka relatoriu KIP ba MP tanba ne’e ha’u lakohi komenta ba buat ne’ebé sedauk ofisialmente mai, tanba ha’u mós sei haree, analiza lai ba lei sira ne’ebé regula ba kriasaun inkeritu parlamentar ninia konfindensial ne’e hotu. Tanba ne’e seidauk koalia ba ida lei fó dalan ka lae,” dehan Arão iha PN, Segunda (02/09).
Nia dehan, tuir lei inkeritu parlamentar, relatoriu ne’e seidauk iha apresiasaun iha plenária sei iha konfindensial. “Tanba ne’e laiha komentariu ba asuntu ne’e,” dehan Prezidente PN ne’e.
