Enkuantu, labarik feto ho naran Ermersia Terezinha, husi Suku Likitura, Postu Administrativu Aileu, Munisipiu Aileu, segunda ne’e (19/09), assume pozisaun nuudar Diretóra Forum Organizasaun Naun Govermental Timor-Leste, durante oras ida nia laran.
Diretóra Interina FONGTIL, Emersia Terezinha, agradese ba Plan Internasional liu husi nia programa labarik feto foti desizaun no mós assume pozisaun.
“Ha’u senti kontente, assume pozisaun hanesan Diretóra Interina FONGTIL, iha oras balun nia laran, hodi bele hatene lidera no sai feto ne'ebé forti liu tan," dehan nia iha Salaun FONGTIL, segunda ne’e (19/09).
Nia hatutan, asume pozisaun ne’e nuudar bukae ida, atu kontinua aprende hodi alkansa mehi no prepara ba futuru.
Iha enkontru entre membru no Diretóra Interina ne’e, koalia mós kona ba preparasaun dialogo nasional ne’ebé sei hala’o semana oin, iha Postu Administrativu Kailaku, Munisipiu Bobonaro.
Entretantu, Koordenadóra PITL, ba Programa Prevensaun Hapara Isin Rua no Kaben Sedu, Laura Soares Abrantes, hatete, kada tinan Plan Internasional selebra loron internasional ba labarik feto.
Nune’e, liu husi atividade sira hanesan, labarik feto assume pozisaun ne’e, ho nia objetivu prinsipal mak atu fó oportunidade ba feto no labarik feto foinsa’e sira atu partisipa no iha esperensia kona ba assume pozisaun.
"Emersia, ohin dahuluk ninia esperensia hanesan Diretóra Interina FONGTIL, iha esperensia lideransa nian, depois nia kontinuanidade remata iha loron 11 fulan Outobru," nia hatutan
Entretantu, Koordenadór ne’e dehan, laos ba Emersia deit mak lidera iha fatin importante sira hanesan, Diretóra FONGTIL, maibé mós iha labarik feto balun ne’ebé antes ne’e lidera ona pozisaun hanesan, Ministra, Sekretaria Estadu no sei to’o ba iha Prezidente Republika.
Enkuantu, molok ne’e, labarik feto ho naran Marcelina assume ona pozisaun nu’udar Diretora Edukasaun Munisipiu Kovalima, Anita assume pozisaun nuudar Administradóra Munisipiu Kovalima no mós Rosa nuudar Prezidente Autoridade Munisipiu Baukau.
