"Ami nia proposta no pedidu ne’e, antes haruka ba ona, maibé ami seidauk simu fós ne’e husi parte CLN,”dehan nia ba Online INDEPENDENTE, iha knar fatin, MSSI-Kaikoli, Dili, segunda ne’e (19/09).

Nia dehan, iha fulan kotuk Ministra MSSI aprezenta karta ida ba iha Sekretariu Estadu Protesaun Sivil, hodi fó apoiu fós saka 2.500 fahe ba familia vulneravel sira, orfonatu no kolejiu iha munisipiu sira.

"Fós ne'ebé ami simu, babain mak apoiu ba ema vulneravel sira no instuisaun sosiliedariedade sosial no instuisaun orfonatu, ferik-katuas, ema ho defisensia, tuir dadus ne'ebé tama," nia haktuir.

Nia dehan, dadauk ne’e, fós iha armajen sira iha diresaun MSSI  nian, iha kada munisipiu mamuk ona, tanba ne’e mak sira husu ba CLN atu fó apoiu.

"Ami konfirma nafatin, mais to'o agora seidauk iha resposta tanba ami nia armazem mamuk ona," tenik nia.

Molok ne'e, Diretóra CLN, Adelina Andrade de Jesus, deklara, nia parte simu ona pedidu husi MSSI atu distribui fós toneladas 1.150.

"Ami simu pedidu husi MSSI, fós hamutuk toneladas 1.150, nune'e atu bele apoiu ba umanitaria balun husi Autoridade lokal, ba ita nia grupu vulneravel ne'ebé persiza,"dehan nia.

Nia haktuir, pedidu ne'ebé MSSI hato'o, sei hein despasu husi MKAE no bainhira hetan aprovasaun ona, hafoin bele halo distribui ba MSSI.

Entretantu, nia dehan, fós labele rai kleur tenke distribui ona, babain fulan tolu  to'o fulan neen, tenke loke ona armajem atu bele asegura nafatin fós nia kualidade.

Enkuantu, nia akresenta, fós kuandu liu ona fulan neen, sei bele distribui, maibé nia kualidade fós mak tun ona.