"Orsamentu Jerál Estadu tinan fiskál 2022 Parlamentu Nasionál aprova rihun $258, hodi apoiu ba Klínika Bairru-Pité, maibé defaktu aloka de'it rihun $68 no rihun $190 ne'e aloka fali ba buat seluk," dehan Deputadu Bankada PD, Mariano Asssanami Sabino, iha Parlamentu Nasionál, Segunda (6/6).
Nia dehan, ne'e périgu tebes tanba orsamentu ne'e tau iha kategoria transferénsia públiku ne'ebé loloos labele ko'a, satán governu mai ho programa.
"Orsamentu ne'e importante tebes ba Klínika Bairru-Pité. Tanba klínika ne'e ema voluntariu Amérikanu, maibé fó nia vida tomak iha tempu rezisténsia, Doutór Daniel, mai hamutuk ho ita halo servisu barak tebes, serví ba povu no rai ne'e," nia hatene.
Maibé, ikus mai nia husik ba mundu seluk, rai hela klínika ne'e. Tanba ne'e, husu governu atu fó atensaun atu klínika ne'e halo servisu atende ba populasaun ne'ebé moras.
"Hau husu ba Ministra Saúde atu haree seriedade atu apoiu, osan ne'ebé atu aloka ba sira sei iha karik, mantein nafatin apoiu," nia informa.
Assanami hatutan, klínika ne'e to'o agora sei mantein nafatin fó asistensia ba inan isin-rua, labarik no moras oioin. Tanba durante ema barak nafatin fó konfiansa ba klínika ne'e.
"Ne'ebé hau hanoin presiza sériu haree tanba kuandu ita aprova orsamentu atu halo transferensia públiku ne'e $100 mós labele ko'a. Satan governu nia pronsípiu ida katak orsamentu por programa," nia informa.
Aliende husu governu atu toma atensaun ba saúde ein-jerál, tanba agora nasaun barak ko'alia oinsá mak ema labele moras.
"Maibé ita nian ko'alia kona-ba kurativu de'it, la'ós oinsá mak prevene. Maibé ko'alia kurativa mós iha ospitál lubuk ida mak seidauk funsiona tuir estandar devia tenke halo, iha ospitál di'ak iha RAEOA no Baukau, seidauk utiliza masimu," Nia afirma.
Nia fundamenta, iha de'it ospitál nasionál guido valadares (HNGV) maibé haree moras barak iha ne'ebá ai-moruk laiha. Entaun husu governu atu hadi'a jestaun.
Deputada Bankada CNRT, Maria Fernanda Lay husu Ministériu Saúde atu tau atensaun ba HNGV ne'ebé falta ai-moruk.
"Ha'u laiha problema privadu ho Ministra Saúde, maibé nia ema ne'ebé ka'er pasta Ministériu Saúde iha devér atu tau matan área ida ne'e," dehan nia.
Nia husu Komisaun permanente Parlamentu Nasionál atu halo fiskalizasaun ba ospitál sira, atu hatene lolos problema saida mak sira hasoru.
Hataan ba ne'e, Ministru Asuntus Parlamentares no Komunikasaun Sosiál (MAPKomS), Francisco Martins da Costa Pereira Jerónimo informa, rejista Deputadu sira nia preokupasaun no sei haruka ba Ministériu Saúde atu fó respostas.
