Esklaresimentu husi HNGV ne’e relasiona ho informasaun husi deputadu PLP, Francisco de Vasconcelhos katak pasiente ida mate iha ospital molok prosesu operasaun remata.
Diretór Jeral HNGV Aniceto Cardoso hatete, kazu ne’ebé akontese iha HNGV ne’ebé membru Parlamentu Nasionál levanta ne’e refere ba pasiente mane ho idade tinan 35 husi Uatulari, Munisipiu Vikeke.
“Pasiente ne’e hetan infeksaun ne’ebé todan tanba ne’e labele salva, laos tanba opera ne’e mak mate maibé bazeia mós ba kondisaun pasiente nian,” informa Diretór Jeral ne’e iha HNGV, Kinta (03/10).
Diretór ne’e dehan, pasiente ne’e sofre moras kabun bubu, muta raan, no infeksaun maka’as. Durante loron hitu (7) nia laran pasiente ne’e tahan moras iha uma, hafoin ne’e mak lori ba konsulta iha Postu Saúde Darabai, Vikeke.
Haree ba ninia kondisaun ne’ebé todan, Aniceto dehan, pesoal saude transfere ba Sentru Saúde Vikeke, no ikus mai transfere tan mai HNGV.
“Depois halo evaluasaun kondisaun jeral pasiente iha indikasaun iha intestinu pasajen hahaan ne’ebé haan la konsege sai ba li’ur. Iha suspeita sangramentu tee oan dodok,” dehan nia.
Haree ba kondisaun pasiente ne’ebé todan, Diretór ne’e dehan, mediku emerjensia halo evaluasaun konjunta entre internista anastensia no tama ba sala operasaun hodi halo USG.
“Leno hotu halo intervensaun operasaun maibé doutor ne’ebé atu bius ne’e esplika klaru ba familia pasiente (katak) opera mós la salva, la opera mós la salva, familia konsiente ida ne’e, sira asina ba halo operasaun,” Diretór Aniceto deklara.
Durante operasaun, nia dehan, doutór sira deteta infesaun grave iha pasiente ne’e nia kabun laran tanba la bele soe bee boot ho normal.
“Pasiente ne’e ninia intestinu delgadu ka tee oan boot nakdulas an, metan hotu kuaze metru ida ka sentimetru 80 no nia intestinu grosu ka tee nurak kuak iha fatin barak, dodok hotu ona, no mós kabun lolon kuaze foer sai ba, ne’ebé foer sira sintina normal la sai, maibé intupidu fali iha kabun lolon halo infeksaun grave iha pasiente ne’e,” nia esplika.
Nia dehan, doutor sira mós esplika katak intervensaun antibiotika ne’ebé fó ba operasaun nian afeita ba sistema orgaun hothotu, inklui mós fuan.
“Tanba ne’e operasaun ne’ebé halo infeksaun jeneralidade halo fuan la funsiona durante operasaun,” dehan Aniceto.
Aleinde ne’e, Diretór ne’e klarifika mós kona-ba pasiente ne’ebé doutór sira muda sai husi sala Intensive Care Unit (ICU) ba sala High Dependent Unit (HDU). Nia fó razaun katak, doutór sira muda tanba pasiente refere la uza makina ventilador.
“Iha sala ICU so ema sira ne’ebé uza makina ventilador mak bele baixa iha ICU maibé kuandu la uza makina ventilador, maibé dependente ba pessoal saude sira, entaun muda ba iha sala HDU, maibé nia atendimentu hanesan de’it,” dehan nia.
Molok ne’e, Deputadu iha Parlamentu Nasionál Vise Prezidente Bankada PLP Francisco de Vasconcelhos informa katak doutór ida iha Hospital Nasionál Guido Valadares (HNGV) halo malpratika ne’ebé kauza pasiente ida mate.
Deputadu ne’e dehan, pasiente refere mate iha sala operasaun HNGV. Tuir informasaun ne’ebé nia simu, Vasconcelhos dehan, pasiente refere mate molok prosesu operasaun remata.
