“Matebian hanesan sidadaun Timoroan, ne’ebé hela iha Maliana, no hetan moras hanesan, iis-boot, me'ar ho isin manas durante loron 4 nia laran, hafoin bá halo tratamentu iha Óspitál Referensia Maliana (HRM) iha loron 27 fulan-Maiu,”dehan nia iha komunikadu sesta ohin.
Rui relata, matebian iha mós moras seluk hanesan, ho istória diabetes no tensaun aas.
Ho nune’e, mediku sira halo teste PCR ba matebian iha Óspitál Referensia Maliana (HRM) rezultadu hatudu positivu Covid-19 ho CT N2gene24,5 no Egene 22,7, hafoin enkamiña, iha loron ne’e kedas, ba fatin Izolamentu Vera Cruz, ho diagnoze traballu Pneumonia grave.
Entretantu, iha Vera Cruz halo tratamentu tuir nafatin protokolu ne’ebé iha, inklui terapia ho oksijéniu liu husi ventilasaun asisitida ho CPAP1.
Nune’e, iha loron 31 fulan-Maiu ekipa médika desidi halo intubasaun hodi liga ba ventiladór no nafatin fó tratamentu sira seluk.
“Ohin (04/06) dader matebian hakotu iis tanba fallansu respiratóriu. Família ho ekipa saúde sira sei kordena hela kona-ba funeral”,tenik nia.
Enkuantu, ema ne’ebé mate ho Covid-19 hamutuk na’in 17 kompostu husi mane na’in 12 no feto na’in 5. Husi numeru ne’e inklui Xineza na’in ida.
Asistente Editor: Saturnina da Costa
